Home Minister Pu R. Lalzirliana chuan Champhai Circuit House Conference Hall-ah vawiin khan Champhai-a Sorkar Department Head of Office-te kawmin, rinawmna nen sorkar hna thawk turin a chah. Home Minister hi Mizoram Youth Commission Chairman Pu T. Sangkunga'n a tawiawm a ni.

Vawiin programme, Champhai DC Pu H. Lalengmawia kaihhruaiah hian Home Minister chuan Sorkar hnathawkte kaihruaitu leh phuar tlat tu Conduct Rules chu hre chianglo leh ngai pawimawh tawklo an awm avangin confidential file social media lam a lo putchhuak ta mai te, office dawr tura lo kalte tawngkam tha a lo chhang duhloh te, Sorkar hna chelh reng chung si a NGO thenkhatah thuk taka inhmang a, Sorkar do zawnga hmalak awm thinte hi tih loh tawp tur a nih thu leh, action lak theih anih avangin fimkhur a pawimawh thu a sawi a. Pu R. Lalzirliana chuan thil tih theih tawp loh tur hotute lam atanga ti tura hriattirna a awm pawhin hlen theih a nih loh dan chiang taka inbengvar chu a tha mai a ni tiin, chutiang vek chuan tuman thil diklo ti turin hotute kawng kawhhmuh tumloh tur a ni, a ti a. Rinawmna nen Pathianin min dahna theuhah hian thawk tlang zel turin kalkhawmte chu a sawm a ni.

MYC Chairman Pu T. Sangkunga chuan Champhai District-a Sorkar hnathawkte chu an post ah an awm tha hlawm hle a hriat thu leh lawmawm a tih thu a tarlang a. Hmun hla leh kilkhawr zawka sorkar hnathawkte zingah a khaw mi leh sa ngeite hi a thawk tha ber an ni mai em tih theih khawpin thahnem an ngaih thin thu MYC Chairman chuan tarlangin, hemi kawngah hian khawi hmuna awm pawh ni ila, khaw mipuite tan a thahnem ngaih tak takna rilru pu chunga hmalak a tul thu a tarlang a. Department hrang hrangte hmalakna a inanglo ang bawkin an harsatna te pawh a inang lo a, chungah chuan District Administration enkawlna hnuaiah felfai takin District tana tha ber turin department tinte thawhona tha nen thawk zel turin kalkhawmte chu a sawm bawk a ni.

Home Minister leh MYC Chairman te hi naktukah Khawbung ah kalin Education Awareness Campaign an hmanpui dawn a ni.