Vawiin khan Commissionerate of Excise & Narcotics chuan an office conference hall-ah Kumthar Thingpui Ruai programme an buatsaih a, he hun hi Home, Rural Development, Agriculture leh Excise & Narcotics Minister Pu R. Lalzirliana’n a hmanpui. He programme hi Parliamentary Secretary Lt. Col. (Retd.) ZS Zuala pawhin a telpui a, Excise & Narcotics Department Secretary Pu H.L. Rochungnunga pawh a tel bawk a ni.

Home Minister Pu R. Lalzirliana chuan Excise & Narcotics Department-a thawk staff zawng zawng te Kumthar duhsakna hlanin an hnathawhna kawngah te an thawhpuite nen thawhhona tha tak neih a pawimawh a, an hnuaia thawkte an rin thiam a hna an thawk chuan Department thawhhona chu a tha thin a ni, a ti.

Sual dona kawnga huaisen a pawimawh thu sawiin Minister chuan thil tha nia an hriat chu huaisen tak a thawk zel turin a hrilh a, dodaltu an awm pawhin, amah chu an hnungah a ding zel dawn a ni tiin thil thalo an tih erawh chuan chhan a tum loh thu a sawi. Minister hian Department a thawk zawng zawng chu Pathiana innghata Amah chauh chhuang a hna thawkturina chah a ni.

Tunhnaia mi rukbo chungchang sawiin Pu R. Lalzirliana chuan Sawrkar hi heng misualte hnuai a awmkanni lo a, cheng khat pawh Sawrkar chuan a pe dawn lo tih hria se tiin an mi rukbo te chu chhuah nghalturina phut tlat a ni, a ti. Sawrkar chu zuam a vau chi a nilo, a ti bawk.

MLTP chungchang sawiin Minister chuan Excise & Narcotics, Police leh tlawmngai pawl ten theihtawp chhuaha hna an thawk chung pawhin a sawt mawh hle thu a sawi. Zu chungchanga “mi hausa te chu an tang rei lova, a tang rei te chu mirethei, hmeithaite leh pachhe zawkte an ni” ti a sawi rik thin chu dan ennawn a, hleih nei miah lova, dan lekkawh ngam a hun tawh a ni, a ti.

He programme hi Pu C. Lalngaihthanga, Dy. Commissioner chuan a kaihruai a, an thawhpui mi panga nikuma boral ta te sunna hun an hmang bawk. He hunah hian Excise & Narcotics Commissioner Pu Lalhmunsanga pawhin thu a sawi bawk a ni.