Nimin chawhnu dar 3:00 am khan Home Minister Pu R. Lalzirliana’n Mizoram Home Guards te training na hmunpui CTI, Sesawng chu a tlawh a. He hunah hian NCO Mess, Tennis Court leh Volleyball Court an sak thar te chu a hawng nghal a ni.

Home Minister Pu R Lalzirliana chuan pawisa tlem te senga thil tha tak mai an sa hian Home Guards te hi midang tihsak ringawt ah innghat lova, mahni tha leh zung senga ram leh hnam tana hnathawk tak tak te an ni, tiin, an thawhrimna leh an hnathawh te chu fakawm a tih thu a sawi. Home Guards te hi volunteer force ni mahse force dangte aiin an duai bik loh thu sawiin inhmuh hniamna nei lova, mipangai chunga leng an ni tih an rilru ah pawm tura chah in, DC thenkhat ten duty tur in Home Guards lo chu an duh loh thu an sawi a hriat te hian Home Guards te hi an mahni hna a rinawm taka thawk thin mi an nihzia a tichiang hle a ni, tiin, hlawh avanga thawk ni lo; mahni mihringpui te rawngbawlna hna thawk thin ‘Voluntary Force’ tha tak an nihna pawh a ti lang bawk a ni, Pu Zira chuan, a ti.

Pu R. Lalzirliana chuan mahni phak tawk leh neih ang zela nun thiamte, chumi milha mahni inchhung inrelbawl leh mahni fate enkawl hian hlawhtlinna a hrinchhuah theih thu a sawiin, he huna tel Home Guards leh an chhungte chu Krismas leh Kumthar hlim tak leh lawm taka an hman theih nan duhsakna a hlan bawk a ni.

Hun kaihruaitu Pu Lalhruaia, Commandant General, Mizoram Home Guards chuan NCO Mess, Tennis Court leh Volleyball Court sak nan hian sum hranpa a bik a kal a awm lova, an mahni inrenchemna atanga an sum khawl atangin sak anih thu a sawi. Tennis Court hi cheng nuai 1.9 leh NCO Mess sak nan cheng nuai 2 vel an sen thu a sawi bawk a ni.