No.7027/2020-2021

Fire & Emergency Services din champha vawi 48 na puala buatsaih Souvenir Magazine chu vawiin chawhnu khan Home Minister Pu Lalchamliana chuan Recreation Hall, Fire & Emergency Services Hqrs Office-a programme buatsaihah a tlangzarh.

Pu Lalchamliana chuan Emergency Services din champha kum 48 na a lo thleng ta chu lawmawm a tih thu sawiin, thawktu zawng zawngte kumthar 2021 lawmawm tak hlim taka hmang turin duhsakna a hlan a. Service Medal lo dawng tawh zawng zawngte pawh lawmpuina a hlan a. Fire & Emergency Services a thawktute chu fakawm a tih thu leh Mizoram mipuiten chhuanawm an tih thu a sawi. Project proposal an  siamte a lo hlawhtlin theih chuan building thar leh motor tharte pawh engemaw zat neih tum a nih thu a sawi a. District hawn thar pathumahte sum leh pai lam indaih lohna avangin Fire Station hawn theih a la ni lova, chutihlaiin Fire tender indaihlohna hriain tunah hian State Disaster Management Authority phalnain Fire Tender thar pathum sak mek a ni, a ti. Home Minister chuan thawktute engtik lai pawha inral ring reng tur leh ruihtheh thilah te inthiar fihlim turin a chah a. Mitin te kangmei ti chhuak lo tura fimkhur tura chahin, Inah leh rama an hnathawhnaah fimkhur turin a chah bawk a ni.

Fire & Emergency Services hi Mizoramah September ni 1, 1972 atanga ding tanin a tirah chuan mi tlemte Assam atanga lo chhuakten bul an rawn tan a. Tunhma chuan Fire Service Organisation tih niin Superintendent of Police enkawlna hnuaiah an awm thin a ni. Kum 2008 atang khan Director post siam niin Police Headquarters enkawlna atangin a hrangin an awm ta a. Officer-te hi Police Officer te la ni mahse Police Department atang chuan inrelbawlna hrang neiin a awm tawh a ni. Kum 2013 khan Mizoram Fire Service Act chu passed a ni a. He dan (Act) hnuaiah hian Rule pawh siam tawh niin August 2019  khan Mizoram sawrkar chuan a lo pawm tawh bawk a ni. Tunah hian Mizoram pumah  Fire Station 14 a awm mek a ni.

Souvenir Magazine tlangzarh inkhawmah hian Pu C. Lalthanmawia, Director, Fire & Emergency Services chu Chairman niin inkhawm a kaihruai a. Kalkhawmte lawmna thu sawiin an department chanchin tlangpui a report a. Pu Sabula, Addl. SP, Fire & Emergency Services chuan lawmthu sawiin hun hnung a khar a ni.