3735/2024-2025

Aizawl, the 9^th January 2025 : Home Minister Pu K Sapdanga’n vawiin Fire & Emergency Services Department-in mipui te tana awlsam zawka insak dawn a No Objection Certificate (NOC) dilna a hmun pan ngai lova Online-a dilna tur Portal  www.fsonline.mizoram.gov.in chu a Pisa ah a tlangzarh.

Home Minister Pu K Sapdanga chuan insak dawna Fire NOC dilna, Fire & Emergency Services Office hmun kal ngai lova, mahni awmhmun atanga online-a a dilna Portal siam tak chu Department tan nilovin mipui tan a ni a, mipui tan awlsamna siamsakin thil pawimawh leh tangkai tak a ni dawn, a ti.

Portal tlangzarhna hi Home Secretary Pu Vanlalmawia chuan kaihruaiin Fire & Emergency Services Director Pu Lalthafamkima Jongte bakah Home Department officer engemaw zat an tel bawk a ni.

AMC Regulations 2012 Clause 5 (3)(ix) in a phut angin AMC area chhunga High Rise Rise Building (metre 15 aia sang) sa turte tan leh National Building Code 2016, Part IV (Fire & Life Safety) in Building a tarlan te tan Fire & Emergency Services Department, Mizoram atangin Fire NOC neih tur a ni a. Hetiang in sa tur te chuan a dilna te hi an insak dan building plan te nan a hmun kalin an thehlut thin a. Chumi hnua Fire & Emergency Services in site inspection a neih hnua Provisional NOC hi an pe thin a. NOC atan hian Mizoram Sawrkarin a duan angin FIRE NOC fee hi Residential Building atan Rs. 1.50 per sq metre (a tam berah Rs. 2000/- maximum) leh Non- Residential Building atan Rs. 3.00 per sq metre (a tam berah Rs. 3000/- maximum) lak thin a ni a. Diltu ten in an sak zawh a Final NOC hi dilna an thehlut leh thin a, Department in kangthelhna hmanrua dah ngai an tarlan te an dah leh dah loh an endik hnua Final NOC hi an pe chhuah thin a ni.

Portal tlangzarh taka hian hengte hi a hmuna kal ngai lovin online in dilna hi www.fsonline.mizoram.gov.in ah thehluh thei a ni tawh dawn a ni. Online Portal hi ICT Department kutchhuak a ni.