Kelkang khawtlang tana Mizoram Sorkar-in abika tanpuina (Special assistance) pe tura ruahmanna a duan bawhzuiin, Zirtawpni khan Home Minister Pu R. Lalzirliana chuan Kelkang khawtlang hruaitute a kawm a, ruahmanna kalpui dan tur leh mipui lam inpuah chahna hrang hrangte sawiho niin, he hunah hian Champhai DC Pu H. Lalengmawia leh he hmalakna in a kaihhnawih sorkar Department hrang hrang hotute an tel a ni.

Home Minister chuan Kelkang chu Mizoram pum tan hmun pawimawhah a chang tawh tih sawiin, a khaw mipuite leh harhtharna chhimtuten an mamawhte chu Sorkarin phuhru turin a inhuam zau hle a ni a ti a. Sorkar in Special Assistance a pek turte chu chak taka kalpui anih theih nan sorkar lama mawhlatu Department te leh khawtlang hruaituten thawhhona tha tak an neih a pawimawh thu tarlangin,  Kelkang khawtlang mamawh phuhru tura hmalakna hi July 2015 chhung ngei a peih fel hman vek beisei anih thu Home Minister Pu R. Lalzirliana chuan a sawi.

Champhai DC Pu H. Lalengmawia chuan Ar leh Vawk sem tur chu thlawhhma la hlei thei lo leh mahni eizawnna kawng zawh thei lova awm mek,  Kelkang khawtlang intun nunna tura (Sumlu atan) ruahman a nih thu leh vulh (puitlin) len a hralh zawh vek anih loh nan mipuite hrilh hreturinkhawtlang hruaitute chu a chah a.  Hmalakna mawhphurtu sorkar Department te pawh chanvo hrang hrang thawk chunga inpeizawn ngai tak si anih dawn avangin phawkhai rual taka thawhho a ngaih tur thu a sawi bawk.

Kelkangah hian chhungkua (household) 237 awmin, chhungtin tan (tui khawlna tur) tuizem litre 2000 dawng Inrinni atang khan sem tan a ni a.  Chhungkaw 8 hnenah (Pety trade) eichawp/bar chawp Dawrte siamna pek a ni dawn a, Chhungkaw 13 hnenah Ar 50 theuh, chhungkaw 216 hnenah Vawk 2 theuh pek anih dawn bakah Ar inchung tur Rangva Bundle khat leh Vawk inchung tur Rangva Bundle chanve pek an ni dawn a. Tunah hian vawk in tur hi 70% vel chu sak zawh tawh niin,  Swach Bharat Abhyan hmalakna hnuaiah Vangtlang inthiarna tur (Ek in) unit 200 Rangva hmanga sak a ni dawn bawk. 

Kelkang leh Dilkawn inkarah bawlhhlawh paihna hmunhma ruatfel a ni a,  Ek in khat tawh paih ruak turin lirthei ruahman anih bakah a paihna hmun tur pawh ruahman fel a ni a. Electric Eng pek belhna (LT line Extension) siam anih dawn bakah Dilkawn bula tui hna awmna chu Kelkang khua nen an rin kawp theih nan a panna kawng pakhat km 1 leh a chanve a thui chu chei that tura tih a ni a, tui harsatna sukiang turin ruahmanna hrang hrang duan ni mahse Greater Champhai Water Supply hmanga pek chhunzawm rih phawt tura tih a ni.