Vawiin khan Home MInister Pu R.Lalzirliana chu Lawngtlai atangin Lunglei a rawn lut a, Lunglei Sazaikawn-a 'District Jail' a tlawh nghal. Home Minister hi Parliamentary Secretary Col.Z.S.Zuala bakah Parliamentary Secretary Pu H.Zothangliana, Bialtu MLA Pu Chalrosanga Ralte, DIG(SR) Pu Joseph Lalchhuana, Addl. Secy.(Home) Pu Lalbiakzama, IG Prisons Pi Zosangpuii bakah Lunglei DC Pu Abhijit Chaudhari leh District officials engemawzatin an tawiawm a ni.

Home Minister-in District Jail a tlawhnaah Jail-a thawkte leh tangte nen inkawmhona hun hman a ni a, he hun hi DIG(Prisons) Pu K.Lalwmthanga'n a kaihruai a ni. Home Minister Pu R.Lalzirliana chuan District Jail hmun tawt leh rem lo lutuk chu hmun tha zawkah sawn tum a nih thu a sawi a, Bialtu MLA Pu Chalrosanga Ralte hovin hmalak mek niin mimal ram neitu engemawzat engemawzatin compensation phut lovin an ram pek an rem ti chu a lawmawm hle a ni, a ti. Jail hi thil tisualtute hremna hmun a ni ringawt lova, nungchang siamthatna hmun a nih ang ngeiin tuna jail tangte pawhin an nungchang thalo laite sim a, mahni insiamtha a, an chhuah hunah pawh khawtlang tan mi thahnemngai leh chhawrtlak ni thei turin tan la theuh turin a fuih.

Prisoners' Welfare Committee-in Home Minister hnenah an duh leh mamawh an thlen, TT Board leh jail office-a hman tur Computer Set te chu DC leh Bialtu MLA-in an ngaihtuah sak tur thu a hrilh nghal a.

Home Minister-in District Jail a tlawh chhinchhiah nan IG Prisons-in Remission phu tawhte chu ni 10 remission pek an nih tur thu Home Minister hian a puang nghal a ni.

Lunglei District Jail hi ni 19 September, 1977 atanga hman tan a ni a, tunah hian kum 38 lai a din tawh avangin a chhunga building thenkhatte chu a tlaram tawh viau a, hei hi sorkar pawhin ngaimawhin Jail hmun zau leh tha zawk ruahman a, building thar leh thuamthat ngaite bawhzui vat a tum a ni. Tunah hian jail tang hi an zavaiin mi 140 an ni a, chung zinga hmeichhia 6 an awm mek.