325/2023-2024

Dated Serchhip, the 4th May, 2023: Vawiin khan Pu Lalchamliana, Home Minister chuan a bial chhung khua Keitumah Martarte hriatrengna Lung phun leh Village Council House (Panchayat Bhavan) a hawng.

Martar thlan leh VC house hawnna puala vantlang inkhawm hi Aided Middle School-ah buatsaih zui a ni. He hunah hian Pu Lalchamliana chuan, Pathian thuin "Mihringin a thian aia a nun a paih a liama hmangaihna nasa zawk tuman an nei lo" tih min hrilh a, vawiina hetiang hun kan hman chhan hi kan thian, hmangaihna nasa ber min hlantu, kan tana Martar te vang a ni a, a hlu bik em em a ni, a ti. Engvangin nge kan thiante an Martara, eng vanginnge zalenna kan sual tak mai? tih hi kan inzawt fovin ka ring. Kan hriat angin Mizofate hi tu hnuaiah mah kan kun ngai lova, mahnia ro inrelin zalenin kan awm thin, chu chu kan pianpui a ni. British sawrkar nen kan indova kan hneh ta lova min awp zui ta a nih kha. India ram hmun dangte nena kan inan loh em avangin British sawrkar khan Excluded Area-ah min dah a, hnam hrang ram hran kan nihzia an hmu chiang hle. Annin min han chhuahsan dawn khan hmana kan zalenna leh hnam hran daih kan nihna ngaihthahin ram pathum India, Pakistan leh Burmaah min phel darh ta mai a. He dinhmun duhawmlo tak ata hi tal chhuah a, Zo hnahthlak unaute rorelna pakhat hnuaia zalena awm kha kan sualin kan bei ta a ni. Chu zalenna atan chuan a ni kan thiante hi an lo Martar tak ni, tiin zalenna sual a nih chhan a tarlang a. Kan Martarte hian anmahni nawm nan an nun an hlan lova, he ram he hnam hi a dinchhuah nan engkim an chàn zawk a ni. An duhnate, a inpek chhante hrerengin keini pawhin mahni inhaivurna leh mahni nawmna ngawt um lovin kan ram a dinchhuah zel theih nan i inhlan thar ang u, tiin mipuite a sawm a ni. Kan hnam tana Martarte hi tunhma atangin theihtawpin kan ngaihsaka, an pual Thlanmual pawh siam niin chutah chuan mi 1563 te Thlan kan dah tawh a, a tul angin kan thuam tha chho zel dawn a ni. Tun kan han sawrkar leh hian kan Chief Ministerin a ngaipawimawh em em mai a, kan sawrkar tirh phat khan Martarte leh an chhungkuate ngaihtuahtu tur bik Committee thunei tak kan din nghal a ni. Amaherawh chu Covid19 vangin harsatna kan tawk zui ta kha a ni a, state sawrkar ten kan beisei angin sum leh pai kan hmu thei ta lova kan tum ang takin hma kan la zui thei ta rih lo a nih hi. Kan Martar chhungkuaten min lo hrethiama min lo nghak hram hram turin ka ngen che u a ni, a ti bawk.

Er. K. Lalsawmvela, Adviser to CM (Tech) pawhin thusawiin, ram tana nunna hlantute chawimawi nachang an hriat avangin Keitum khawtlangte chungah lawmthu a sawi a. An lungphun sak Martar zinga pakhat Pu Lalchawia phei hi chu a thianpa a nih thu leh a hun hnuhnung ber a thih niah pawh a kiangah a awm ve thu a tarlang a ni. Mizoten zalenna kan sual zarah vawiin thlengin kan ram kan hnam hi humhimin a awm a, hmasawnna tam tak kan hmua, kan hmu zel bawk ang. Zalenna sual ve lo kan thenawm hnamte vawiin dinhmun atanga inteh pawhin a lang fiah hle a ni, tiin ram leh hnam tana beitute thawhrah a taka kan seng mek thu a tarlang bawk.

Martar Lung an phun sakte hi mi pathum Lalchawia, Ralliana leh Lalvena te an ni. Village Council House hi cheng nuaih sawm (10 lakh) senga sak a ni a, a building bakah hian a chhung cheina leh hmanraw mamawh thenkhatte lei tel nghal a ni.

Vantlang inkhawm hi Pu Vanlalchansanga'n a kaihruaia, Pastor C. Lalremsanga'n hunserh a hmang a, tlai lamah khawtlang huapin ruai an buatsaih bawk.