1910/2025-2026

Aizawl dated 29th August 2025: Vawiin khan Home Minister Pu K.Sapdanga chuan Mizoram College of Nursing, Falkawnah zirchhuakte thlahna leh zirlai thar lawm luhna hun,’ 38th Graduation & Lamp Lighting Ceremony 2025’ chu khuallian niin a hmanpui a. Pi Lalduhsaki, Principal, MCON chuan MCON hnuaia hmalakna leh hmachhawp hrang hrang tarlanna hun hmangin Pi Lalrinpari, Nursing Superintendent, MSCI chuan ‘Lamp Lighting Ceremony’ hun a kaihruai a ni.

Home Minister Pu K.Sapdanga chuan Mizoram College of Nursing-in tun dinhmun thleng thei tura tun hma leh tuna thawktute thawhrimna leh inpekna chu entawntlak a tih thu a sawi a. Dam lo tha taka enkawl thei tura thiamna inzirtirna hmun, thiamna chhawrtlak leh tangkai nei tura thalai inchherchhuahna hmun pawimawh tak, Mizoram College of Nursing kan nei chu vanneihthlak a tih thu a sawi.

Home Minister chuan mizo zingah India rama hna inziahtlin hautak bera a ngaih, UPSC-a inziaktling thei an awm ta mang lo chu manganthlak a tih thu a tarlang a. Sawrkar hnuaia hna pawimawh tak chelh thei tura UPSC-a inziah tlin kawngah mizo thlalaite chu kan harh thar a pawimawh thu a sawi.

Pu K.Sapdanga chuan India ram hmun hrang hranga Healthcare Facility Centre changtlung tak takah mizote chu Nursing service-a thawhhlawk berte zing ami kan nih thu a sawi a. MCON zirlai leh zirchhuakte chu sawrkar behchhan kher ngai lova eizawnnatlak thiamna zirchhuah tum tlat turin leh an thiamna chu midangte tan a malsawmna ni thei tur khawpa tangkaia hmang turin a chah a. BSc. Nursing thiamna nei thlalaite chu ram hausakna hlu tak an nih thu a sawi.

Minister chuan, Sawrkar hna thawktuten khawpui a awm tum ringawt rilru kan paih a ngai, tih a sawi a. Hmasawnna rualkhawi a awm theih nan thiamna leh theihna hrang hrang nei thawktute chu hmun hrang hranga inzarpharh a pawimawh thu a sawi a. Vawiina 38th Graduation & Lamp Lighting Ceremony 2025 a zirlai lawmluh tharte leh zirchhuak thlah takte chu hlawhtlinna chang zel turin duhsakna a hlan bawk a ni.

Pi Lalduhsaki, Principal, MCON tarlan danin MCON hi kum 2005-a kalpui tan a nih atangin zirlai 494 in an zirchhuak tawh a. Thawktu, Teaching Staff 20 leh Non-Teaching Staff 26 an awm mek a ni. Tun session-ah hian zirlai 129 an awm mek a, State pawn atangin zirlai 11 an awm bawk a ni. Tarlan danin, zirchhuak tawhte zingah mi 98 chuan sawrkar hna an zawm a, mi 245 te chu Contract leh Private Hospital-ah an thawk a, State pawn a hnathawk mi 79 leh ram pawn a hnathawk mi 59 an awm bawk a ni.

Vawiin 38th Graduation & Lamp Lighting Ceremony 2025 ah hian BSc. Nursing zirlai thar mi 28 lawmluh an ni a, 17th Batch zirchhuak mi 30 thlah an ni. Zirlai titha chawimawina, ‘Academic Excellence Award’ chu Liandingpuii Hmar, 17th Batch hnenah leh Laltlanhluii, 17th Batch, Lalhunthari, 18th Batch leh Vanhmingliana, 19th Batch hnenah ‘L.Chhawnkima Award’ hlan a ni. MZU Exam 2025 result chhuak hnuhnung berah khan MCON zirlai atangin Pathumna leh Pangana dinhmun an hauh a, zirlai 12 chu distinction-ah an pass bawk a ni.