Vawiin chawhnu khan Home Minister Pu R.Lalzirliana chuan R.Dengthuama Multipurpose Hall-ah 26th Mini National Volleyball Championship chu a hawng a. He Championship hi Volleyball Federation of India(VFI) kaihruaina hnuaiah Mizoram Volleyball Association(MVA) in a thleng a; April 28 khian a tawp ang. 

26th Mini National Volleyball Championship hawngtu Home Minister Pu R.Lalzirliana chuan VFI in National Level tournament  beiseina sang tak nena Mizoram a thlentir chu thil lawmawm tak a ni a ti a. State hrang hrang atanga infiammite chu an cham chhungin hun hlimawm tak an neih Mizo mipui ten kan duhsak bakah  nidangah pawh Mizoram rawn tlawh thin turin kan sawm a ni a ti a. Infiamna chu inelna thianghlim a nih angin lawman leh chak an tumna kawngah infiammite chuan infiammii rilru an put chhunzawm reng a ngai tih a sawi a. Infiammite chu  an taksa leh an nungchang uluk kawngah pawh entawn tlak  ni turin a chah a ni. Home Minister Pu R.Lalzirliana, MVA Patron ni bawk chuan  Mizoram in sports discipline hrang hrangah nasa taka hma a sawn rualin Volleyball-ah pawh hmasawnna hmuhchhoh mek a ni a ti a. Pro-Volleyball league pawh MVA leh an thawhpuite hmalakna in hlawhtling takin neih a nih thin thu leh India rama volleyball thiamrual - National player te pawh heng League team-ah hian an tel tih sawiin Mizo mipuiin Volleyball an phur chhoh pui mek tih 26th Mini National Volleyball Championship team te chu a hrilh a. 26th Mini National Volleyball Championship chuan India ram tan player tha tak tak a chherchhuah a beisei thu sawiin India ram state hrang hrang atanga lo kal khawm te tan inthianthat leh zualna pawh a siam ngei a rin thu a sawi a ni. 

26th Mini National Volleyball Championship-ah hian state 19 atangin hmeichhe team 17 leh mipa team 18 an rawn  tel a. Player zawng zawng hi 432 an ni a, team official 108 bakah player te nu leh pate mi enge maw zahin tournament hi an rawn chhim a. VFI referee 9 leh state referee 60 ten 26th Mini National Volleyball Championship hi an vil dawn a ni. 

26th Mini National Volleyball Championship hawnna inkhawm hi VFI Vice President  Dr.Lalmalsawma Nghaka'n a kaihruai a; MSSC Secretary Pu C.Laltlanthanga'n tournament a rawn tel te lawmna hun a hmang a; khualzahawm, VFI Adhoc President Pu Ratindra Nath Roy Chaudhury hnen pawh in 26th Mini National Volleyball Championship puala thuchah a ni.