No.3504/2021-2022

Aizawl the 23rd December, 2021 : Home Minister Pu Lalchamliana chuan vawiin khan mipui hnena thuchah ti chhuakin Mipui zawng zawng te Krismas leh Kumthar lo thleng tur Chibai a buk a.

Kan Lalpa Isua Krista khawvela a rawn pianna champha Krismas leh Kumthar 2022 chu kan hma lawkah a lo awm ta reng mai; Mizoram mipuite hi kum dang ang chu nise, hlim leh lawm takin tun ang hunah chuan hmun tinah kan ri hut hut tawh ngei ang le. Kuminah erawh chuan COVID-19 hrileng avang hian kan duh ang leh tum anga ropuiin Lal piang chibai kan buk thei dawn lo a; chutih rualin kan thinlung erawh i buatsaih thar theuh ang u, a ti a ni.

Mizoram Sorkar chuan kumin Krismas 2021 leh Kumthar 2022 vuakvetah hian Zu leh ruihhlo chi hrang hrang te, halpuah leh halmawi lam chi te, sky lantern leh naupang silai lem a mu nei chi te chu mihring hriselna tan leh kan chhehvel boruak tan te a that loh bakah chhiatna dang te thlen thei an nih avangin khap leh nise a ti a, kan tawn chinah chuan mipui pawhin kan zawm tha niin a lang a, kan hmabak hun tlem te la awmah hian uar takin Mizoram mipuite thlawpna ka ngen duh a ni, Home minister chuan a ti a.

Hunpui atana venhimna hna thawktu Police te, Fire & Emergency Service duty te, YMA, YLA, MTP, YCA leh khawtlang mi tlawmngai duty te duhsakna ka hlan a. Kan lo tih dan thin angin mipuite pawhin kan himna atana duty-a chhuakte hi i thlawp tha zel ang u, a ti.

COVID-19 avanga kan buaina te a la reh loh avangin hri laka kan himna tura Sorkar-in SOP a siam te leh CAB te ngai pawimawh turin mitin te ka ngen duh bawk a. He hunpuiah hian kum tluana hah leh rim taka COVID-19 kaihhnawih hna thawktu Health Department lama kan thawktu te, Local Level Task Force te, Village Level Task Force te leh tlawmngaia inpe te zawng zawng chungah lawmthu sawiin Chibai ka buk a ni, Pu Chama chuan a ti.

"Kan State ramri buaina avanga mahni inlum thlahlel thei lova venhim hna leh ram humhalhna hna chi hrang hrang thawka pen chhuak te Krismas leh Kumthar Chibai ka buk a che u. Police te chauh ni lovin pawl hrang hrang leh mimal tamtakin thilpek leh mahni pen chhuakin ram hmangaihna in lantir a; in inpekna avanga kan thlen chin zelah hian Mizoram mipuiten kan fak tak meuh che u a ni.

Ka bial Hrangturzo A/C chhunga mitin te Krismas leh Kumthar chibai ka buk vek a che u.

A tawp berah chuan kan hunpui Krismas leh Kumthar hi hlim leh lawm taka hmang theuh turin Mizoram mipuite ka duhsakna ka hlan che u a; kan hlimna leh lawmna hian kan chhehvel ami te thleng pha theuh se la. Thenawm khawveng nen inremin, mahni chhungkua theuhah hlim takin hmang ila; Dikna ngai pawimawh ila, kan Lalpa pianchamah hian Pathian khawngaihna in chungah lo thleng theuh rawh se,"Home minister chuan a ti a ni.