Vawiin khan Mizoram Secretariat Service Association General Conference vawi 8-na, Tourist Lodge Chaltlanga neih chu Home Minister Pu R. Lalzirliana’n a hmanpui.

Home Minister chuan Mizoram Secretariat Service (MSS) te chu ram inrelbawlnaa hnuk pawimawh ber pakhat, an tel lova sorkar inrelbawlna pawh kal theilo tiin an kutah sorkar hmasawnna, ram leh hnam than zelna thui tak a innghah avangin an lakah beisena sorkarin a nei sang hle a ni, a ti. Secretariat tihchak dan tur leh officer ten an hna theuhah hma an sawn theih dan tur chungchang an sawiho tur chuan rah tha tak a chhuah ngei a beisei thu Minister chuan a sawi a. A tu a mah thiam saa piang an awm lova, a inzir peih apiangin hma an sawn mai thin, a ti. Mi rintlak leh rin ngam, thiltih reng renga dik tak leh fel taka ti thin, mahni mawhphurhna a hun taka hlen thin mi, an rawngbawlsak mipui te ngai pawimawha rethei leh chan chhe zawk te tana belhfakawm ni turin a chah a. Thuruk vawng thei, sorkar thu kal vel a hun leh a chhuahna hmun dik taka chhuahtir thin tur leh hun vawng dik, inchei leh nungchang thleng pawha mi dang te entawntlak ni turin Home Minister Pu R Lalzirliana chuan a hrilh bawk a ni.

MSS Conference hi an pawl Vice President, tuna Additional Secretary Agriculture ni mek Pu RT Nghaka’n a kaihruai a. Kum kalta chhunga an pawl hmalakna tlangpui General Secretary Pu F Lalrinawma chuan a sawi a. Kum kalta chhunga an pawl member boral pahnih Laldailova, Deputy Secretary leh Pu C Lalliantluanga leh Pu F te sunna hun an hmang.

Chawhnu lamah rorelna hun leh infuihtharna hun an hmang a. Vawiina an thu rel tlangpui chu Compulsory Training Regulations leh an pawl service rules chungchang te a ni a. Secretariat inrelbawlna chak leh felfai zawka kalpui dan tur te, an pawl member tin ten an awmna hmun apianga tangkai lehzuala tan an lak dan turah te huang zau taka sawihona leh infuihtharna hun an hmang a ni.