62/2025-2026

Aizawl dated 4th April 2025: Vawiin chawhnu khan Pu K.Sapdanga, Minister, Home Department chuan Multipurpose Hall, PHQ, Khatlaah Police Conference 2025 kharna hun a hmanpui a. Pu Anil Shukla, DGP chuan kalkawmte lawmna thu sawiin Pu Rahul Alwal, SP,CID(Crime) chuan Police Conference 2025 chhung a hun hman dan tlangpui a tarlang a. Conference ah hian District tin aṭangin SP, SDPO leh Inspector 2 ṭheuh, Battalion hotute bak ah PHQ aṭangin Gazetted Officer zawng zawng an tel a, Duty hlenchhuak tha te hnen ah chawimawina thuziak hlan a ni.

Home Minister Pu K.Sapdanga chuan mipui him nana dan bawhchhia dap chhuahna kawngahte, dan phal loh bungraw tawlh ruk man chhuahna kawngahte leh khawtlang ralmuang siam nana dan leh thupek kenkawh kawngah Mizoram Police-te hmalakna a thangmawi thin hle chu lawmawm a tih thu a sawi a. Thil thar zirna hun leh intuaihriamna hun tha tak nei a Police Conference 2025 buatsaih a ni chu lawmawm a tih thu a sawi.

Pu K.Sapdanga chuan Police Department chu mipui venghim tur leh thlamuantu tur an nih angin mipui thlamuanpui tlak a nun uluk a pawimawh thu te, ruihhlo lak a fihlim tur leh taksa hriselna ngai pawimawh turin a chah a. ‘Train to Excel’ tih thupui chawi nung a, taksa sawizawi uar tur leh ei leh in te uluk turin kalkhawmte a chah bawk a ni. Home Minister chuan Police Department-a thawktu indaih lohna leh Department building tlabal leh thawmthat ngai engemaw zah awmte chu theih ang anga hmalakna kalpui a nih thu a sawi a. Constable 295 lakna tur Physical Fitness Test pawh tluang tak a kalpui a nih thu tarlangin, Exam la awm turte pawh dik leh langtlang tak a buatsaih tum a nih thu a sawi a. Hna lak belh kawngah hmalak mek a nih rualin mahni duty tha tak a hlenchhuak thei tura a thawksa te thiamna leh theihna tuihriam pawh thil pawimawh tak a nih thu a sawi a. Thawk thei lo hlawh pek reng hi Sawrkar phurrit a nih avangin mahni mawhphurhna hlenchhuak thei lo sawrkar hnathawk an awm leh awm loh zirchiang a, chutiang mi an awm a nih chuan Mizoram Special Voluntary Retirement Scheme 2024 emaw, Periodical Review of Government Employees under Fundamental Rules 56 dan tlawhchhan a chawlhtir an nih tur thu a sawi.

Home Minister chuan ram him veng tur a hna dil kan ni tih hriat reng a pawimawh thu leh hna avanga insawn hi kan hna ken tel a ni tih hriatchian a tul thu sawiin, hnain a ken tel hmathatna hrang hrang bak thil dang it lo turin Police-te a chah a. Pu K.Sapdanga chuan Mizoram Police zingah mahni duty pel a khawtlang tan a inpekna thuk tak nen a hna thawk thin mi thahnem tak an awm chu fakawm a tih thu sawiin, Mizoram Police tihmingtha chhunzawm zel tur a hnathawk turin a chah bawk a ni.

Police Conference 2025 kharna hun ah hian Pu Shivendhu Bhushan IPS, SP, Champhai; Pu Gavit Gogna, IPS, SDPO, Champhai; Pu Dennis Vanlallura MPS, Dy. SP (Hqrs), Champhai te hnen ah chawimawina thuziak hlan a ni a. Pu H. Ramthlengliana IPS, IGP (L&O) chuan lawmthu sawina hun a hmang bawk a ni.