3421/2023-2024

Aizawl 22nd January, 2024 : Pu K. Sapdanga, Home Minister chuan vawiin khan G.S Arya Mess Police Headquarters tlawhin Mobile Forensic Van pali (4) District Executive Force (DEF) Aizawl, Lunglei, Champhai leh Kolasib-a hman tur a vailiam.

Mizoram Police hotu kalkhawmte fuihna thuchah sawiin Home Minister chuan Discipline tha taka kengkawh tur leh State dang Police te chin tha lo chu an tih ve a rem loh thu a sawi a. Police tanglai 8000 vel chauh awm mahse an Uniform te nawtmar a, theihtawpchhuah turin a chah a. Post awl 4000 vel awm leh thil dang mamawhte pawh a tul anga ngaihtuah zel anih tur thu sawiin ruihtheihthil avanga DEF leh Battalion lama sipai thi an awm thin chu thil pawi tak a ni tiin an naute chu khawng taka enkawl a, an mawhphurhna hlen turin a chah bawk a ni.

Mobile Forensic Van hnuchhui nana hman tur te hi pathum (3) Basic Model niin pakhat (1) hi Higher Model a ni a. National Forensic Sciences University, Gujarat leh Kwick Soft Solution Pvt. Chennai te kutchhuak niin Higher model hi Rs. 82,53,482/- man a ni a. Basic Model hi Rs. 44,99,999/- man niin pathum man belh khawm hi 134,99,997/- a ni a. A vaia a pali man belh khawm chu Rs. 217,53, 479/- a ni. 'Assistance to States for Modernization of Police' hnuaiah Mobile Van te hi lei a ni. Mobile Van te hi General Investigation Kit, Narcotics Detection Kit, Explosive Detection Kit, DNA Collection & Sexual Assualt Kit a thuam niin Higher Model hi Digital Evidence Investigation Kit leh Nano Pro Digital Investigation Kit a thuam a ni bawk.

Home Minister hian lawmman chi hrang hrang sem nghalin Champhai PS Officer -in- Charge (OC) hnenah lawmpuina thilpek a hlan a. Champhai Police Station chu nikum 2023 a Annual Ranking of Police Station-ah Pali-na dinhmun an hauh avangin kumin Republic Day 2024-ah India President hnen atangin President Medal Champhai SP-in a dawng dawn bawk a. Best District in CCTNS Project hnuaia DEF titha ber lawmman chu Aizawl SP hnenah trophy a hlan bakah Inspr. R.K.Rosangliana, CID (SB), Asadharan Aasuchana Kushalata Padak Awardee hnenah leh C/257 Amos P.C. Malsawmzuala, Lawngtlai DEF te hnenah lawmpuina leh chawimawina a hlan bawk a ni.

He hunah hian Pu Anil Shukla, IPS, DGP chuan kalkhawmte hnenah lawmthu sawiin Pu Lalbiakthanga Khiangte, IPS, IGP (Hqrs.) chuan hun tawp lawmthu sawina a nei a. Home Minister hi Home Commissioner leh Home Department OSD te'n tawiawmin Mizoram District SP, Commandant te bakah Police hotu lian te he hunah hian an tel tha hle a ni.