Home Minister Pu R.Lalzirliana chuan nimin khan Saitual High School II building sakna tur lung a phum bakah Saitual Residential Sports Academy a hawng.
   
Lawmna inkhawm Saitual BRC Hall a neih ah  Minister chuan Rastriya Madhyamik Shiksha Abhiyan (RMSA) kaltlanga Saitual High School II sakna tur neih theih a nih bakah Saitual ah Saitual Residential Sports Academy lawmawm a tih thu a sawi a. Minister chuan  school tha tehna te chu building tha, school naupang, result tha leh zirtirtu te an ni a,  zirtirtute hian an school naupangah ram leh hnam hmangaihna te, huaisenna te leh rinawmna an tuh bakah tumruhna te, taimakna te leh tih tak zetnate hi zirlaite rilru ah zirtirtu tak tak chuan an tuh thin a ni a ti. Pu Zira chuan eng  ang ruahmanna tha pawh duang chhuak ila, a tipuitlingtu tur zirtirtuten rual elna, thahnemngaihna, taimakna te nena kan hmachhawn loh chuan awmze neiin tihpuitlin a ni leh dawn chuang lova chuvangin zoram pum a zirtirtute hian kan ram leh hnam dinchhuahna kawngah tih tak zeta hma la thar turin a ngen a. Saitual bial hmasawn tur hrang hrang sawiin Minister chuan Saitual leh Ruallung inkar chei that turte leh Saitual tan tui lakna tur siam anih tur te a sawilang.

Lawmna inkhawm hi Pu K. Riachho, IAS, Secretary & Director, School Education in a kaihruai a. Tun tum RMSA hnuaia HS building sak tur lungphum phum hi vawihnihna a ni a, a vawikhatna chu  Lal Thanhawla High School, Serkhan ah Chief Minister in a phum tawh a. Saitual Residential Sports Academy hi Aizawl District ah a pahnihna a ni a, pakhat chu College Veng, Aizawl ah awmin naupang 30 an awm mek a ni. Tunah Saitual ami ah hian naupang 24 an awm thei dawn a ni. He Academy ah hian khaw hrang hranga sports thiam bikte enkawl an ni ang.

Pu R. Lalzirliana hi Pu C.Ngunlianchunga, CEM, LADC leh Official dangten an tawiawm a ni.