Home Minister Pu R.Lalzirliana chuan riakin Keifang leh Saitual a tlawh.Ni 4.5.10 khan Keifang ah Thlai thar Bazaar(Rural Haat) AMFU leh NABARD te sak a hawn hnuin  ni 5.5.10 khan Saitual Govt Higher Secondary School ah Pawl 10 leh 12 Exam a zirlai hlawhtlingte lawmpuina hun MZP Hqtrs,Saitual buatsaih ah khuallian a ni bawk.
Keifang a Rural Haat hawnna inkhawm ah hian AMFU  hotute bakah NABARD Official te an tel tha hle. Minister chuan Mizote chu hnam taima kan nih thin thu leh kan pipute atanga intodelh hnam kan nih thu a sawi a.Hmang chang kanhriat tawk loh vang te leh remruatna fel tak kan neih hmasak thin loh vang ten kan hmalakna tamzawk  hlawhtling fumfe tawk thin lo mai a ni a ti.NLUP hmasa pawh kha chungkaw tam takin an hlawhtlinpui a, tuntum ah chuan sawrkar leh NLUP dawngtute an fimkhur tawh zawk dawn a vangin a hlawhtling leh zual dawn a Mizoram in kan hauhsak phah ngei a rin thu a sawi.NLUP dawngtu tur te chu an NLUP Trade thlan dan ah an fimkhur  angai dawn hle a, Trade inang deuh vek an thlan chuan a hralhchhuahna ah harsatna a awm palh a hlauhawm a ti.Sawrkar laipuiin Ni 100 inhlawhna a lo siam ve leh zel bawk si avang te hian NLUP kan kal pui tur pawh hi tih hlawhtlin a awlsam phah sawt a rinawm a ni a ti.VC leh kuthnathawktu thenkhat sawrkar tanpuina lo dawng tawh thinte pawh corruption lakah an fihlim zan bik loh thu a sawi a, sawrkar hnathawk zawng zawng rinawmlova  dah bik chu a dik vek bik loh thu  leh mi tlemte eiru vang mai in hmingchiatna  a lo awm thin zawk a ni a ti.Sawrkarin Corruption a do na ti chak turin ACB a thuam lian mek zel a CBI kohluhna kawngka pawh a inhawng mek zel a ni a ti.Mizoram chhim leh hmar a kal chhuah tawh thu leh kawng tha tak tak te a lo awm tawh avanga lawmawm a tih thu a sawi.Minister chuan Chhim leh hmar a in hlat tawh lova, Chhimtuipui lui a Kaladan Multipurpose Project a puitlin hun phei chuan MIzoram chu India khawvel tukverh leh sumdawnna kawtchhuah a la nih tur thu a sawi.

Saitual Higher Secondary School ah ni 5.5.10 khan Zirlai pass thar mi 150 te lawmpuina hun MZP, Saitual buatsaih ah Home Minister hi khuallian a ni nghal. Minister chuan zirlai te chu nakin lawk a kan ram hruaitu tur te an la nih thu a sawi a, tun an hlawhtlinna a lungawi nghal mai lova hmalam pan zel turin a chah.Vawikhat Exam na a Fail hi hlawhchhamna a ni lova, zirnawn pawh thiam leh zualna tho a ni a ti.Sawrkar tehna ah chuan sikul naupang thiamsa te chauh admit a result tha pui pui neih chu Sikul tha tihna a ni lova; mi tupawh lo admit a hlawhtlin tir hi a ni zawk a ti.zirtirtute inpekna pawh hmuh hmaih chi a ni lo a ti; an sikul naupang te chu nakin lawk a ram leh hnam, khawtlang leh kohhran, NGO a mi hmantlak tak tak ni thei turin an buatsaih a ngai a ti.Saitual khua chu Kristian te in humhimna tura lo din a nih avang in rilru inhawng tak leh khawdang te entawn tlak a ke pen turin a chah. Mizoram chhung khaw hrang hrang te hi khaw bil rilru paih a inunauna leh inpumkhatna kawnga ke kan pen rual a ngai a ti.Tunhnai a District thar Pathum  lo siam tak chu ruahhman felfai  a siam a ni loh avangin tun din hmunah a hlawhtling thei lo tih mi thilchhut mi te chuan an hre thei ang a ti bawk. Lawmpuina inkhawm ah hian MZP General Hqtrs lam atangin hruaitute an kal tha hle a, MZP President VL Kroshnehzova pawn fuihna thu a sawi bawk.