Tun hnaia thlipui leh ruahpui nasa tak avanga Thingsulthliah khuaa in chhiate Home Minister Pu R.Lalzirliana’n a tlawh a, Thingsulthliah BDO, VCP leh khawtlang hruaituten an lo hmuak a ni.

 

 

Thingsulthliah leh a chhehvel khua - Tlungvel, Thingsulthliah Tlangnuam leh Sesawng-ah te hian thlipui leh ruahpui hian in 66 a ti chhia a. In 14 chu chhe vekin in 18 dangte chu luah tlak lohin a chhia a, in 34 te chuan chhiatna nasa lutuk lo an tuar a ni.  Heng in chhe zingah hian UPC (Mz) Sande Sikul Hall te, Anganwadi Center-IX leh Thingsulthliah Middle School-I te a tel a ni.

Home Minister, bialtu MLA ni bawk Pu R.Lalzirliana chuan thinlung takzeta a tuarpui thu sawiin Mizoram puma thlipui leh ruahpui avanga chhiatna tuartute tanpui dan tur Cabinet-in a rel dawn tih a sawi a. Rangva leh silpaulin pawh a tul ang zela sem a nih tur thu a sawi bawk. Home Minister hian Thingsulthliah khuaa chhiatna tawkte hi tlawh kualin hnatlang thingpui in nan Rs.1000 a pe nghal a, Thingsulthliah VC hnenah a tul ang zela hman turin silpaulin 8 a pe nghal bawk. Home Minister hian Thingsulthliah khawtlang hruaitute hi Community Hall sak dan tur a sawipui bawk a ni.

Nizana thlipui leh ruahpui avanga in chimin a delh hliam tuar Pi Malsawmi (kum 56) w/o Pu Lalchhuana, Thingsulthliah Salem Veng pawh Home Minister hian tlawh nghalin tanpuina Rs.500 a pe.