818/2024-2025

Aizawl, the 14th June 2024: Vawiin chawhnu khan Home Minister Pu K.Sapdanga chuan Directorate of Forensic Science Laboratory, MINECO a tlawh.

FSL Conference Hall-ah FSL officer te nen inkawmna an nei hmasa a. He hunah hian FSL Annual Report 2023-24 a tlang zarh hnuiin FSL hnathawkte fuihna thu sawi chhunzawm nghal a. program neih zawhah Laboratory 8 leh a chhunga hnuchhuina khawl leh hmanraw pawimawh te a endik nghal a ni.

Home Minister Pu K.Sapdanga chuan hmasawnna in a rawn ken tel tak avangin pawikhhawihna leh misual hnuchhui te a hautak sawt a. Science thiamna hmanga uluk taka chhui a ngaih tak zel avangin Forensic Laboratory pawimawhna hi a pun belh zel a. Thawktute tam lovin, indaihloh hle mahse India ramah misual hnuchhui kawngah Mizoram Forensic Science Laboratory te an hming tha hle a, an chhuanlam takzet a ni a ti.

Home Minister chuan Directorate of FSL te mamawh te chu a hriat thu leh hun remchang hmasaah thawm changtlun dan tur te pawh ngaihtuah a ni ang a ti a. Tun dinhmunah erawh, thawktute chu an indaihlohna ngaihtuah lovin an pawimawhna hrechiangin theihtawp chhuah zel turin a fuih a ni.

FSL officer leh staff te chu misual hnuchhui kawngah an pawimawh tluk zetin mi pawisawilo case nei te chhuah zalenna atan hna pawimawh tak an thawk tih a sawi a. Hei vang Huang, pawikhawihna leh misual hnuchhui kawngah Forensic leh Cyber Crime lam tihchangtlun hi a tul a, police te tha tichak leh zual tura thil pawimawh ber pawl a ni mek a ni a ti.

Directorate of FSL-ah hian Laboratory pawimawh tak tak 8 a awm mek a.
1. Chemistry Division
2. ?Fingerprint Division
3. Questioned Document Division
4. Ballistic Division
5. DNA Division
6. Photography Division
7. Toxicology Division
8. Cyber Forensic Division te an ni.

NDPS Act of 1985 hnuaia Notification that berin a phut angin FSL a sample thehluh hi ni 30(Ni 15 qualitative leh ni 15 dang quantitative) chhungin endik a, result siamchhuah hman tur a ni a. FSL thawktute chuan case a tam avangin officer leh staff tlem tein rim takin an thawk a, indaihloh a karah pawh state dang ten kum 10 aia tam te case tam tak an dah tawl(pending) laiin Mizoramah chuan case pakhatmah pending a awm lo ( Zero pendency) an ti a. India ramah FSL Mizoram chiah hi zero case pendency ti la thei an nih thu an tarlang bawk.

Home Minister puala program tawi, FSL Conference Hall-ah a buatsaih hi Director Pu H.Sangchunga'n a kaihruai a. Thuhmahruaiah FSL hmalakna hrang hrang, hlawhtlinna leh mamawh tul zual deuh te a sawi hmasa tel bawk. Home Minister hova inkawmna program hi Joint Director Pu T.Lalropuia chuan Lawmthu sawiin a khar thung.