1028/2024-2025

LUNGLEI;the 1^st July, 2024: Vawiin chawhnu dar 1:00 khan Convention Hall, Convention Centre, Lungleiah LMC Award, 2024 for Cleanest Ward kick-off programme hman a ni a. Pu K.Sapdanga, Hon’ble minister Home, UD&PA etc. leh Pu C.Lalsawivunga, Hon’ble minister, LAD, DC&MA Dept. etc chuan khuallian leh khualzahawm niin programme an hmanpui.

Khuallian Pu K.Sapdanga chuan thu sawiin, Lunglei khawpui hi tunhma atang tawhin kawng hrang hranga Mizoram mit tikeutu a ni a. Kohhran leh politics-ah pawh Mizoram mit tikeutu a ni. Politics-ah pawh Mizoram a meichher chhit hmasakna leh meipui lo alhchhuahna a ni. Chuvangin he LMC Award pawh hian  Faina kawngah Mizoramah tan meichher  chhiin, meipui a lo chhuah leh dawnin ka hria a, ka lawm hle a ni, a ti. LMC hi kum lo tling tawh mahse MLA leh Lok Sabha inthlanpuia MCC khan hnathawk thei lovin a phuar a, State sorkar lah MCC phuarin thla 3 vel a han awm ve leh a, chuvangin kum 1 tha chu hna thawk thei lovin a han awm a ni a. Hnathawk theia a awm hun chhung hi a la rei lo hle a ni. Mahse June 6 atang chuan kut-ke phuarna chu phelhin a lo awm ta a. Lunglei khawpui tana hnathawh châk zek zek tawh LMC councillor te pawhin  chak takin Lunglei khawpui tan hna a han thawk ang a, Lunglei khawpui chu Mizoram khawpui dangte entawn tlakin an siam ngei ka beisei a, chutiang atan chuan duhsakna  ka hlan a ni, a ti.

Khualzahawm Pu C.Lalsawivunga pawhin thu sawiin, AMC kan indin tirh  khan kum 2 chhung chu pawisa kan nei lo a, sawrkarin hnathawhna tur sum min pe a, subject te a han  transfer chuan Municipal hi khawpui enkawlnaah a lo chungnung hle a ni. Kan CM leh UP&PA Minister (vawiin kan khuallian) te hian Lunglei khawpui tih hmasawnna tur hi an vei em em a, kawng hrang hranga thuamchakna tur pawh ruahhman mek a, a pawimawh ber chu thawhhona tha a ni. Chhiat ni-that ni-ah tumah kan  inthen hrang thei loh ang hian, Lunglei khawpui tana hna kan thawhna-ah hian Party hian min daidang suh se. Mahni hmazawn theuhah theitawp  chhuah tlang  i la, dikna  ngaina i la, Pathian lakah i rinawm tlat ang u. Taimakna leh thawhrimna nen, Lunglei khawpui tan, kan district tan Mizoram tan thawkho turin ka sawm che u a ni, a ti. 

Vawiin programme hi Pu K.Lalrinawma, Vice Chairman, LMC chuan kaihruaiin, Rev.H.Lallianzara, Administrtive Secretary, PCI chuan hunserh a hmang a, Sub-Hqrs YMA zaipawl ten Hawnna hla an rem a. Pu Lalzuithanga, Chairman,LMC hnen atangin thu sawi tawi ngaihthlak a ni. Pu Zuia chuan LMC hi kum 1 leh thla 3 upa a nih tawh chung hian Model Code of conduct avanga leh sum lam harsatna avangin hna tak tak an la thawk thei lova, tunah erawh chuan MCC te hlih a lo nita a, a, LMC hnuaia sawrkar hna post 33 lai sawrkarin a lo hnawhkhat thuai dawn a. Hna an thawk ve thei tawh dawn a ni. Kan ngaihpawimawh hmasa ber 2 te chu Lunglei khawpui Traffic management leh Sanitation hi a ni, a ti.

Pu Zorinsanga Hmar, Executive Councillor chuan LMC Award 2024 for Best/ Cleanest Ward chungchang sawiin, LMC hian Lunglei khawpui sanitation hi a ngaihpawimawh ber te zing a mi a ni a. Chuvangin Mizoram State sawrkarin District leh Village level Fai inelna a buatsaih thin ang dungthulin Ward fai inelna hi buatsaih tum a ni a.Inel chhung hunbi hi kumin kumtluan a ni ang, a ti. Assessment Framework chi 6 te tarlangin:

1.     Cleanliness at a glance

2.     Beautification of Public & residential Areas

3.     Cleanliness in Educational Institutions

4.     Maintenance of Public Toilets & Urinals

5.     Waste Collection & Segregation at Source

6.     Cleanliness and maintenance of Drains te an ni a. A vaiin mark 750 a pu dawn a ni.LMC Award hian 1^st Prize in ₹3 lakh + trophy, 2^nd  Prize in ₹2 lakh + trophy leh  3^rd  Prize in ₹1 lakh + trophy  a keng dawn a, ward 1 tan consolation  Prize  ₹30,000/- siam a ni bawk dawn a ni.

7.     Vawiin programme-ah hian Lunglei South bialtu MLA Pu Lalramliana Papui, President Lunglei Local council leh President Sub-Hqrs,YMA Lunglei ten thu sawina hun an hmang bawk.

Pu Donny Lalruatsanga, CEO, LMC chuan lawmthu sawiin vawiin programme hi a khar ta a ni.