1393/2022-2023

Aizawl, the 28^th July 2022 : Home Minister Pu Lalchamliana, Disaster Management & Rehabilitation (DM &R) enkawltu Minister ni bawk chuan vawiin khan ATI Auditorium MINECO, DM &R Department in Mizoram Sawrkar hnuaia Department hrang hranga Disaster Management & Rehabilitation changtu Nodal Officer te tan an mahni Office theuha hman tur Disaster Management Plan siam leh duan chungchang leh a pawimawhna te inzirtirna ‘Two Days Training on Department Disaster Plan for all Department under the Government of Mizoram’ tih  ni hnih awh training an buatsaih chu a hawng.

Home Minister Pu Lalchamliana chuan khuarel chhiatrupna hrang hrang - lirnghing, leimin, thlipui te leh mihring thlen chawp harsatna- kangmei, leimin tih te engtiklai pawha thleng thei anih thu sawiin hengah hian mitin mai kan fimkhur a, a theih ang ang a kan lo in ven a, hma kan lo lak lawk a, kan lo inpuahchah hi thil pawimawh leh tul tak a ni , a ti a. Sawrkar Department tan pawh chhiatrupna laka invenna kawngte, chhiatna a thlen palha hmalak dan tur lo duan leh ruahman lawkte,  Sawrkar hmunhma, office, bungrua, lehkha pawimawh leh thawktu him leh him lohah ngaihtuahna sen a tul hle tiin he training kaltlangin Department ten an mahni hman theuh tur Disaster Management Plan felfai tak an ruahman chhuah leh a lo neisa te pawhin an neihsa te tichangtlung a, an ennawn a beisei thu a sawi.

DM & R changtu Minister chuan Disaster Management & Rehabilitation Minister chuan Disaster Management hi chhiatrupna a lo thlen a lo hmachhawn leh in chhanchhuah leh chhawmdawlna in pek (Response leh Relief) ringawt hi a ni lova. Chhiatrupna kan tawng palh thei a ni tih hria a, tawrhna thlen hma daih a lo inhmakhua a, in ruahman lawk a, lo inpuahchah lawk (Preparedness), lo inthuam that (Mitigation) leh lo inven lawk (Prevention) te hi a pawimawh em em mai tih kan hriat tlan a tul hle, a ni, a ti.

Pu Lalchamliana chuan Disaster Management lamah hmalakna leh inpuahchahna thenkhat a tarlang a. Chungte chu - Mizoram State Disaster Management Plan te, District Disaster Management Plan te siam a, a tul ang zel a siamthat leh update zel tur thu te; Aizawl District ah mi 100 chuangin ni 12 chhungin Aapda Mitra (Community Volunteers) Scheme, National Disaster Management Authority in an duan an training chhuah te; hetiang kalpui turin District dang 5 - Lunglei, Mamit, Kolasib, Champhai leh Serchhip te thlan belh an nih thu leh Mamit District ah chuan he training hi tunhnaiah an zawh thu te; Home department nena tangrualin State Disaster Response Force kalpui mek zel anih thu te; nikum July ah Fire & Emergency Service thuam chak nan High Pressure Pump Fire Tender 3 hlan an nih thu te; District Disaster Management Authority te thuamchak nan SDRF leh SDMF te pek bakah Sawrkar in ERV (Emergency Response Vehicle) pe vek tura a tih fel tawh thu te leh District tinah District Quick Response Team din a nih deuh vek tawh thu te an ni.

Training hawnna hi Pi K. Lalrinzuali, Secretary, Disaster Management & Rehabilitation in kaihruaiin Dr. Lalrokima Chenkual, Deputy Director (Trg.) DM &R in training in a tum tlangpui te a sawi a. Department hrang hranga Nodal officer te an tel kim hle a ni.