No.1352/2021-2022
Aizawl, 12th July, 2021 : Vawiin khan Home Minister Pu Lalchamliana’n tunhnaia Mizoram leh Assam ramri buai chungchangah ama Office Chamber-ah chanchinthar lakhawmtute kovin Press briefing a nei a; a hnuaia mi ang hian ‘Press Statement’ a siam a ni :

Mizoram leh Assam hian ramri km 160 chuang zet a sei kan neia. Kan hriat theuh angin, Mizoram leh Assam ramri buaina hian kum tam tak a awh tawh a, District Council leh UT hunlai atang tawhin vawiin thleng hian buaina neuh neuh kan nei reng thin. Hei hi tun thleng hian chinfel loh a la ni a ni.

1. Tun hnaiah Mizoram leh Assam inrinaah Assam-in hmathar lain buaina leh harsatna an rawn siam thar leh hi tha kan ti lova, kan dem takzet a ni.

Kar hmasa lamah khan Pu Chalchhunga Buarchep khaw huana thlaite tichhiain hma an rawn la a. Mihring eizawnna in tihchhiatsak hi a vanduaithlakin a inzahloh thlak kan ti a, a awm tawk compensation pe turin Assam Sawrkar hi kan phut a ni. Hei hi a hlawhtlin theih nan Mizoram sorkar pawhin theihtawp chhuahin a bawhzui ang.

2. Ramri buai chungchangah hian thal thlah hmasatu nih hi tha kan ti lova, amaherawhchu, a tul ang zela hma la turin kan Sawrkar hi a inpeih a ni.

3. Ramri venghima mipuite thlamuan turin kan Police-te a hmunah thahnem tak an awm mek a. A awmsate a tul anga tichak tur leh pui turin tunah hian kan theih anga tam thawn belh an ni a, a tul dan a zirin a dangte pawh inralring tura tih an ni.

4. Tunah hian ramria kan Police duty mekte mamawh ang ang pek mek zel an ni a, a tul angin Sawrkar pawhin an mamawhte a ngaihtuahsak zel ang.

5. Ramri buai avanga eng eng emaw harsatna a lo awm a nih pawhin, mipuite tuarchhel taka awm turin ka chah duh a ni.

6. Ramri buai chungchanga Mizoram Sawrkarin hma a laknaah hi mimal emaw, pawl ang emaw, hmingthat lak tum emaw, inchirhtheh nan emawa hman tur chi a ni lova. Hnam anga kan tanrualna tur chi a ni.

7. Assam nena kan ramri buai chungchangah hian sawihona nei turin Chief Minister zahawm takin All Party, NGO leh MKHC te Joint Meeting July ni 14, 2021 (Nilaini) hian a kova. Hetah hian lungrualna tha tak kan neih theih ngei ka beisei a ni.

Home Minister hi Information & Public Relations Minister Pu Lalruatkima, School Education Minister Pu Lalchhandama Ralte, Serlui bialtu MLA Pu Lalrinsanga Ralte, Home Secretary Pi Lalbiaksangi leh IGP Pu John Neihlaia ten an tawiawm a. Home Minister-in Statement a siam zawh hian thuthar thehdarhtute zawhna a chhang a ni.