Tun hunah hian mipuite hnenah thu sawi duh ka nei a :-

(1) Krismas hunlai vela Halpuah hal leh naupang silai lem kahna tak, inhliamna, ram tui lei lova siam theitu lek chhuah District Magistrate ten an khap a, Krismas lai vela halpuah puak ri hriat tur awm mang lova mipui ten thuawih taka thupek an zawm kha lawmawm ka ti a ni.
 
 
Naupang silai lem lo lei a indo lem zira hmang thinte pawhin an lek chhuak hmuh tur a awm ta lo hi a lawmawm ka ti em em a.

Mahni nuam tihzawng chauh ngaihtuah lova midang damlote, Pathian biakna hmuna bengchheng siamte, boruak tibawlhhlawh thei tih luih duhna kan nei ta lo hi hmalam panna kawngah nasa takin hma kan sawn tan ta a ni.

(2) Krismas vuakvet velah accident rapthlak lutuk awm lova hun kan hmang te hi a vanneihthlak takzet a. Motor neitu leh driver-te fimkhurna avang a ni a, an chungah lawmthu ka sawi bawk a ni.

(3) Dan leh thupek kengtu Magistrate te, Police leh Excise & Narcotics Department - Dan leh Thupek keng kawhtu ten rim taka an duty-naah lawmthu ka sawi bawk a ni.

(4) Mizo mipui ten a hun takah tihtur kan tih a, a hmun takah dah tur kan dah chuan hnam zahawm tak kan lo ni thei mai dawn a. Chuvang chuan kumin kumhlui thlah zan, ni 31.12.2008 zan dar 11:30 PM atanga 1.1.2009 zing dar 1:00 AM thleng te hi chuan Halpuah leh Halmawi hal duhte tan kan District Magistrate-te hian phalna pe thei se ka duh khawp mai.

(5) Pathian hruainain kum thar lo thleng tur kum 2009 hi hlim tak leh tluang taka hman beisei ila. Financial Year thar atang hi chuan sawrkar tharin tha thar in hma a la tan tak tak thei turah ngai ila.

Mizo mipui ten kan chan tur changlo ni a inhriat avangin pawl thar la piang ngailo tam tak a lo ding tawh a. Hei hi Corruption a tam vang niin a lang.

Chuvang chuan kan Party President, tuna CM zahawm tak ni ta, Pu Hawla chuan Corruption hi nasa takin kan do dawna, a zung nen lam kan pawt phawi ang a, kan pho ro ang a ti a. A sawi ang ngei hian Corruption kungpui chu kihthluk a niin a zungpui te nen lam mipuite vote hmangin kan lo phawi ta a. A zungthlak si per la phawi fai loh a awm a nih pawhin a chawm liantu nilo turin theihtawp Pu Hawla sawrkar chuan chhuah a tum a ni.

Corruption checked tur hian sawrkar leh mipui tanrualna lo chuan hma chak taka lak a harsa hle dawn a, chuvangin, Corruption dona kawngah mipuite nasa taka min tawiawm a thawhpui turin ka sawm tak meuh che u a ni.

(6) Kan Chief Minister zahawm takin tun hunah hian mi tupawh khua leh tui tha ni a, nunphung pangngai a awm duhte tan ngaihdamna hun a hawng a. Hei hi kan ram chhunga cheng ngaihdan hran nei a tharum thawh duhna hial lo nei tawh zawng zawng pawhin an ngaih pawimawh ka duh a. Nupui fanau leh chhungte bulah thlamuang taka awm turin mitinte ka ngen nawn leh a ni.

Kumthar hlim taka hmang turin Mizoram mipuite duhsakna ka hlan che u a ni.

Ka lawm e.

Attachment

  • Loading attachment...