Pu R.Lalzirliana, Home Minister leh Bialtu M.L.A ni bawk chuan a bial chhung Rulchawm Branch MHIP Day lawmna a hmanpui.

Home Minister chuan bial chhung mipuiten an duhsakna avanga lawmthu sawiin ram hmasawnna atan Sawrkarin theihtawp a chhuah chung pawhin duhthu sam lo lai te a awm thin a ni a ti a, Rulchawm khaw mipuiten MLA Fund an hmuh atanga hma an lo laknate a hmuhin lawmawm a tih thu a sawi bakah thil tha ti tak tak duh mi bial mipuite a nei chu vannei a intih thu sawiin khaw dangte tan pawha entawntlaka hna thawk zel turin a fuih nghal bawk a ni.

Bial chhung hmasawnna tura hmalakna hrang hrang sawiin Minister chuan Rulchawm khaw kawng siamna tur pawh sum ruahman vek tawh a niin hun reiloteah kawng laih hna tan anih tur thu a sawi a, he kawng hian Ruallung leh Sedaikawn thlengin a pawh dawn a ni a ti bawk. Hei bakah hian Minister chuan Rulchawm Community Hall sak thuai anih dawn bakah, Saihmartlanga tui lakchhoh tura ruahmanna awmsa pawh chak taka bawhzui a niin kumin chhung ngeia hna thawh tan hman tum anih thu a sawi a, Maite kawng sial mek pawh kumin chhung ngeia zawh fel hman tum anih thu a sawi bawk.

Home Minister chuan MLA Fund atangin kut khawl khawtinah eizawnna atana hmang tangkai thei tur miretheite hnena sem anih theihnan ruahmanna kalpui mek a nih thu a sawi.

Home Minister chuan nute chu an pawimawhna inhre reng tura chahin khawtlang nun siamthatna pawh inchhung atanga tan a ngai a ni a ti a, nute chu a tam thei ang ber an fate bula hmanga inchhungkhur uap lum tura chahin, sum leh pai ngah aiin fanau fel leh Pathian tih neih a hlu zawk a, Pathian thu leh Mizo thawnthu tha zirtir nei tak takte an fate zirtir fo thin turin kalkhawmte a chah a, kohhran, khawtlang leh MHIP a an pawimawh lutuk avanga inchhungkhur an ngaipawimawh hman lo anih chuan MHIP thil tum ber an bawhpelh mai ang tih a hlauhawm a ni a ti bawk.

Home Minister chuan mizote hian a hnam ang pawhin hmeichhiate hlut nachang      leh ngaihsan nachang kan hriat zel tawh avangin hmeichhe rawn tlak leh puitling nih tuma tan la theuh turin MHIP memberte chu a chah nghal bawk.

Home Minister chuan khawtlang mipuite chu an inlungrualna fakawm a tih thu sawiin dikna, rinawmna leh huaisenna nena kal zel tur leh Sawrkar hruaitute pawh a tula sawisela, zilha fuih ngam turin a chah a, tanrual a tul thu a sawi a ni.

Rulchawm MHIP Day lawmpuina atan hian Home Minister chuan Silpauline pahnih leh Football pahnih a pe a, Rulchawm MHIP ten mirethei tanpuina atana an hman turin Rs. 2000/- a hlan nghal bawk a ni.

Vawiin MHIP Day hi Rulchawm Presbyterian Kohhran Centenary Hall-ah hman a niin, intihhlimna chi hrang hrang neih a ni a, in leh a vel vawng fai thlan chhuahte hnenah lawmman Home Minister hian a sem a, tlaiah ruai kilho nghal a ni.