Vawiin chhun dar 12 khan Home Minister Pu R. Lalzirliana chuan Saitual Secondary School building thar a hawng a; he school thar hi RMSA Mission, Mizoram hnuaia cheng nuai 55.5046 senga sak a ni.

Home Minister Pu R. Lalzirliana chuan RMSA Mission hnuaia Mizoram hmun hrang hranga school building thar tha tak tak sak chhoh mek a ni chu zirna lama Mizoram hmasawnna tur a nih ngei a beisei thu leh sorkar-in zirna tha a ngaihpawimawh zia tilangtu a ni, a ti a. “Zirna hian chhungkaw tin a nghawng a, chuvang chuan zirtirtute pawhin kan hnam ro enkawltu kan ni tih kan hriat chian a pawimawh a. Kan ram hi hmasawnna kawng hrang hrangah thang chak hle mah ila a luah tu tur mihringte hi rilru leh taksa kan puitlin loh chuan awmzia a nei thei lovang” Pu R. Lalzirliana chuan a ti.

Home Minister chuan zirlaite leh nu leh pate fuihna thu sawiin, “Zirna hi tih tak meuh a beitute tan chuan hlawhtlinna kawng zau tak a la in hawng reng a; Mizoram sorkar hnuaiah chauh nilovin central service leh hna peng hrang hrangah te pawh mi thiam tak takte tan chuan thawh sen loh a awm reng a, a pawimawh ber chu lehkhathiam ziktluak nih hi a ni. Chutiang dinhmuna kan din theuh theihna turin sorkar-in school building tha mai bakah zirtirtu thiam tak tak te min pe zel a, hengte hi hlawhtlinpui theuh kan tum tur a ni” a ti.

Home Minister chuan kan rama hmasawnna dik a thlen theih nan thangtharte leh thalaiten zirna lamah leh infiamna kawnga nasa taka tan an la chu lawmawm a tih thu sawiin Mizoram hmel ti mawitu leh ti hmingthang tu ni theuh tura zirlaite leh thalaiten tan kan lak zual sauh sauh a pawimawh thu a sawi bawk.

Pu T. Rohmingliana, State Project Director, RMSA pawhin thu sawiin RMSA hnuaiah school thar hlak 23 sak zawh tawh anih thu leh school building awmsa 154 chei that mek a ni a ti a. Sorkar kumtharah hian school thar 32 leh thingtlangah zirtirtu hmeichhia te chenna tur quarter 141 sak thuai tum anih thu a sawilang bawk. RMSA Mission hnuaiah High School naupangten Mizoram pawna study tour an neihna turin ruahmanna siamfel a nih tawh thu Pu T. Rohmingliana chuan a sawilang bawk.

Vawiina hawn tak Saitual Secondary School ah hian class room 4, science laboratory, computer room, arts & crafts room, library, teachers common room, headmaster office, clerk room leh mipa leh hmeichhia inthiarna changtlung tak a awm a. He building hi February, 2010 atanga sak tan a ni.