Vawiin chawhnu dar 2:30 khan Home Minister Pu R. Lalzirliana chuan Mualpui hmuna 3rd MAP hmun a tlawh a, Police DG, DIG, SP CID te leh 3rd MAP Commandant ten an lo hmuak a ni.

 

 

Police hotute leh amah zuitu Pu Lalrinmawia, Parliamentary Secretary, Power & Electricity Deptt., PWD leh I & PR hotute nen 3rd MAP Commandant Office-ah thukhawmin thingpui in hona an nei a, tah hian Pu Zira chuan helai hmun an kal chhan sawiin sorkar hmasain Stadium sak nana AR Ground an lo buaipui tawh chu tha hle mahse, khawpui laili-ah stadium puitling neih chuan Aizawl khawpui Traffic nasa lehzualin Motor-ah leh mihringah pawh a ti buai dawn tih ngaihtuahna bakah thil tam taka remchan lohna an hriat avangin Mualpui MAP Field bawr vel hi thlithlai nise tih sorkar chuan a duh thu a sawi.

Pu Zira chuan, “Police Deptt. hmun anih avangin kan hotuten rawtna siam ngawt mahse, keimahni kan in rawn tlan phawt hnuah rem kan tih chuan survey chi hrang hrangte neih nise tiin ka lo kal hmasa a ni” a ti. DG Police leh a thawhpuite chuan Field chu Police parade-na leh training hrang hrang an neihna hmun anih avangin remchang lo hleah an ngaih thu te, mipui leh security mite inpawlh lutuk an hlauh thu te an sawi bawk.

Home Minister chuan tuna Field an hmanlai chu tibuai lovin, a chhak tlang rawt hniama chumi chu tha tawka an rin thu te a sawi hnuah phur takin a chhak tlang lawn chhovin an thlir hova, Engineer-te leh mithiamten survey nei thuai se tiin a rel.

 

3rd MAP hmun a tlawh hian helai chengten electric an chhit man tam lutuk, commercial rent ang an bill bik chhan te, Police department tan chuan harsatna nasa tak an tawh phah anih thu te, Minister chuan engtinnge siam fel anih theih ang tih te P & E Department hotute nen an sawi hova, Pu Zira chuan, “Venghimtu sipai kan mamawh em em te, harsatna chinfel kawngah hian P & E department te pawhin theih tawp min chhuahpui a tul dawn a, ngaihtuahna hmang hova tan kan lak a tul a ni,” tiin kalkhawmte a chah a ni.