1527/2024-2025

AIZAWL,the 10th August, 2024: Vawiin chawhnu dar 4:45 khan Hon'ble Minister of State for Rural Development, Gov't of India chuan BDO Office, Aibawk RD Block a tlawh a. Pu Kamlesh Paswan hi Pu KM Singh,Director PMGSY leh Pu K.Hrahmo MLA ten an tawiawm a ni.

Hon'ble Minister of State Pu Kamlesh hi BDO Conference Hall, Aibawkah RD official te, Khawtlang Hruaitute, RD Dept.hnuaia Scheme hrang hranga  Beneficiaries ten lo hmuakin, inkawmhona hun hlimawm tak an hmang.

He inkawmhona hun hi Pu Zarzosanga,  Commissioner &Secretary, RD Dept chuan kaihruaiin, Pi Esther Leihang, BDO, Aibawk R.D Block chuan PowerPoint presentation hmangin BDO Office, Aibawk RD block  hmalakna hrang hrang leh hmachhawp mek te entirin;  report  a pe a.

Inkawmhonaah hian thu sawiin Minister Pu Kamlesh chuan  Prime Minister Narendra Modi hian India Hmarchhak state te kawng hrang hranga tih hmasawn hi a tum hle  a, kawng hrang hrangin hmasawnna rahbi pawh tuk mek  a ni. Chuvangin kei pawhin ka Ministry chan hnuaia hmasawnna hnathawh mek te dinhmun leh eng harsatna nge an tawh ti te hre turin ka lo tlawh che u a ni, a ti. Minister chuan Aibawk RD Block hnuaia heng Scheme hrang hrang :Pradhan Mantri Awaas Yojana-Gramin (PMAY-G) Pradhan Mantri Gram Sadak Yojana (PMGSY), MGNREGA, Deen Dhayal Upadhaya Grameen Kaushalaya Yojana(DDU-GKY), MzSRLM etc. viltu leh buaipuitu official te chu chipchiar takin an hmalakna te zawtin, beneficiary te hnenah pawh harsatna  an neih te zawtin, inkawmhona hun an  hmang a ni.

Pu Kamlesh Paswan hian BDO office,Aibawk RD Block a tlawh hma hian Muallungthu khuaa PMAY-G (Housing for All) hnuaia  sak  Pu MS. Dawngliana In chu a tlawh hmasa.