3587/2023-2024

LUNGLEI; the 31st January, 2024: Vawiin chawhma dar 11:00 khan Pi Lalrinpuii,Hon’ble Minister for H&FW,SW&TA leh Tourism Dept. leh Lunglei district chhunga Head of Office(HoO) ten Convention Centre, Lunglei-ah inkawmhona hun an hmang.He Inkawmhona hun hi Pi Ramdinliani District bawrhsap chuan a kaihruai a, Pu T.Lalhlimpuia, Lunglei West bialtu MLA leh Pu Lalramliana(papuia),Lunglei South bialtu MLA te pawn an telpui ve a ni.

Vawiin inkawmhona hunah hian thu sawiin Pi Rinpuii chuan ZPM Sawrkar thar hian ram in hma a sawn theihna tura hmachhawp tam tak a nei nghal a,100 days programme pawh duanchhuah nghal a ni. Chuvangin vawiina HoO local khawm te hian District level a ZPM Policy mil budget in lo siam tawh ka ring a, Lunglei District tana hmasawnna tak tak tur mil budget hi min ngaihtuah pui zel turin ka sawm che u a. Mahni Personal Bank Account a Sawrkar sum dah chungchangah pawh in lo inchin fel vek tawh ka beisei a ni. Lunglei office-ah hian Biometric attendance kan la hmang thei rihlo anih pawh in, thawktu zawng zawngte chu kan hnathawhna mahni post- ah theuh tha tak, regular tak leh Office timing dik taka vawng theuh turin kan beisei che u a.Head of Office te chuan Office timing vawn dik chungchangah in staff te entawn tura in awm hmasa tur a ni. Tlai dar 4-a kim taka staff zawng zawng te nena bang ho dial head of office ni theuh turin ka chah duh che u.Hna a awm emaw, awm lo emaw, tihtur a awm emaw awmlo emaw, Office timing chhunga kan hnathawhna hmun, kan hlawh hmuhna hmuna kan awm hi kan tihtur a ni a, chu chu a Kristian a, a Pathian thu em em a ni, a ti.Mizoram Right to Public Services Act pawh ataka hmanga ti hlawhtling nghal vek turin officer rual kalkhawmte chu a chah hlawm bawk.

Kan ramah ruihhlo in bu a khuar ngheh tawh em avang hian keimahni level theuhah min dopui turin kan Head of Office te ka sawm che u a, Kan office theuhah awareness nei thar leh i la, Office hour chhunga rui ngam khawpa huaisen te kan nei anih phei chuan Excise lama hlan ngam khawpa huaisen Officer ni theuh turin ka ngen duh che u, a ti bawk. Austerity Measures chungchang sawiin Pi Rinpuii chuan Kan resources neih chhun ang ang te hi a tangkai thei ang ber, a tha thei ang ber, a in ren thei ang ber in hmang i la, Pen leh paper mai mai atang te hian hma la tan ang u.Tui mal far te te in luipui a siam angin; tlem tlem a kan inren theuh chuan chumi chuan hmasawnna liantham zawk a hrin chhuah ngei ka beisei a ni. Office bungrua leh kan hnathawhna hmanrua te hi mahni ta anga dim leh ren a hmang turin ka chah nawn duh che u a ni, a ti.

Convergence chungchang sawiin Minister chuan nimin lamah khan kan DC ho in, LMC a kan councillorte leh hotute, PWD lam hotute, Revenue lam hotute, leh Tourism lama kan hotute nen Tourist Lodge, Zotlang kan en ho a, keimahni tihtheih zawng theuha hmalak dan tur a hmunah kan han sawi ho chu, hun rei tak chhung harsatna lo awm tawh pawh awlsam takin kan solve mai dawnin a lang a. A tak taka nimin lama Convergence kan han kalpui ka hmuh khan a hlawkthlak ka ti lutuk a, Lunglei District hmasawn nan Convergence hi I uar lehzual ang u, tiin ka sawm duh che u a ni. Officer te hi inkawmngeih ula, in hmu tam ula,in ego te dahtha in, in kuta theihna awm theuh te khan tih hlawhtlin tum bik (Goal & target) neiin han luankhawm tir u la, hmasawnna pawh a lo thlen that phah ngei ka beisei tlat a ni. Tihtur leh tihtheih hmachhawp hi han tam hmasa ve hrim hrim se la, theihtawp in kan tang ho anga, nasa zawkin hlawhtlinna pawh kan nei thei ngei ang, tiin Head of Office te chu nasa lehzual a Lunglei District hmasawn nana thawk turin a ngen hlawm a ni.

Pu Obed Lalmalsawma, BDO Lungsen chuan Aspirational Block Lungsen tana hmalak tawhna leh hmachhawp hrang hrang te Power Point Presentation hmangin a tarlang a ni. Sawrkar laipui chuan dawmkan deuh ngai district-Aspirational district atan mamit District hi a lo thlang tawh a. Tunah chuan Block level-ah sawrzimin,Mizoram chhunga district 3 atangin RD Block pakhat theuh: Mamit district atangin Reiek RD Block, Saitual District atangin Ngopa RD Block leh Lunglei district atangin LUNGSEN RD Block te chu Aspirational Block atan an lo thlang leh ta a ni.He aspirational Block atan hian sawrkarin a hranin sum pek a nei lo va, amaherawh chu Sawrkar scheme leh programme hrang hrang awmsate chu he Aspirational block-ah hian a tha thei ber leh anih tur ang taka kalpui ngei ngei tur a ni.

Minister Pi Rinpuii chuan Lungsen Aspirational Block chungchangah sawiin, tehna hrang hrang hmanga teh anih hnua chawikan ngai zual block Lungsen Block hi Department hrang hrang in i ngai pawimawh tlang ang u. Keini Health Department lam chuan hma kan la nghal a, Health & Wellness Centre kan hawn tharah pawh thawktu kan dahkim nghal tawh a ni,a ti bawk.

Pu T.Lalhlimpuia MLA hnen atanga thu sawi ngaihthlak a ni hnuah, Head of Office kalkhawm te atangin an Department theuh vin harsatna hrang hrang an nei te chu Minister hnenah an thlena, Minister pawhin theitawp chhuaha an harsatna sutkian nana hma a lak tur thu tarlangin, zawhna hrang hrang te pawh a chhang nghal a ni.

Vawiin inkawmhona-ah hian Head of Office te an kim hle a,Pu Donny Lalruatsanga, Addl.DC chuan lawmthu sawinain vawiin programme hi a khar ta a ni.