Vawiin khan Champhai District chhunga Horticulture Department hnuaia NLUP 2nd Phase beneficiary-te hnenah 3rd Installment tanpuina Champhai Vengsang YMA Hall-ah sem a ni a. He hunah hian Champhai DC charge la mek Pu Zoengsanga chu Khuallain niin, tanpuina hi a sem nghal a ni.

DC Pu Zoengsanga chuan ram intodelh kan nih theih nan mi thenkhatin an tha leh ngaihtuahna sengin, harsa tak chunga sum tam tak a thlawna sem chhuah a ni chu a dawngtuten a hlutzia an hriatthiampui a beisei thu a sawi a. Ram sum dunhmun leh kan khawsakzia inmillo lutuk chu siamtha turin mitin kan pawimawh thu sawiin, kan tu leh fate chenna tlak ram siam turin kan neih tawk leh phak tawkah tupawh rinawm leh taima taka kan thawh a ngai a ni, a ti a. Khuallian chuan Horticulture Department thawktute chu an taimakna a fak a. Horticulture hnuaia NLUP beneficiary-te hnenah chuan installment awm leh tur pawh dawng chhunzawm tlak ni tura thawk turin a fuih nghal a ni.

Champhai District puma Horticulture hnuaia NLUP 2nd Phase 3rd Installment-a sem tur zat hi cheng nuai 100.55 niin, Constituency tina sem tura peihfel vek tawh a ni a. Vawiin hian Champhai North leh South Constituency chhunga beneficiary 341-te hnenah cheng nuai 36.73 sem a ni a. Vawiin tanpuina sem hi an thil thlan azirin leitha leh huan hungna leh hrui zamna bakah tuikhuah siamna tura ruahman a ni a. Serthlum chingtu beneficiary ten Rs. 9,000 dawngin, grape leh sapthei thlangtute hnenah Rs. 12,500 theuh pek niin, lakhuihthei thlangtute hnenah Rs. 8000 theuh pek niin, thingpui thlangtute hnenah Rs. 10,000 pek a ni.

Champhai North A/C-a khaw 18-ah serthlum chingtu mi 45, grape chingtu mi 117, lakhuihthei chingtu mi 2 leh sapthei chingtu mi 2 an awm a. Champhai South A/C-a khaw 15-a beneficiary 175 zingah hian mi 55-in Serthlum chingin, mi 62 in grape an ching a, lakhuihthei hi mi 49-in chingin sapthei hi mi 5-in an chin bakah thingpui huan nei mi 4 an awm bawk a.

Vawiin NLUP tanpuina semna hun hi Pu V. Lalzuithanga, Divisional Horticulture Officer, Khawzawl Division chuan kaihruaiin, NLUP tanpuina chu a dawngtuten dik taka hmang turin leh, NLUP thil tum tihlawhchhamtu nilo turin beneficiay-te chu a chah a. Pu Ngurthankima, Horticulture Extension Officer, Champhai Sub Division chuan hunserh hmangin, Pu Jacob Lalmalsawma, Horticulture Extension Officer, Khawzawl Division chuan Technical report a pe a. Pu C. Lalremsiama, Sub Divisional Horticulture Officer, Champhai Sub Division chuan lawmthu sawiin hun hi a khar a ni.