3544/2024-2025

Aizawl dated 16th December 2024: Vawiin chawhma khan GITAM University, Visakhapatnam chuan Horticulture leh Rural Development Department, Government of Mizoramin an mamawh anga an hman turin ‘Hybrid Solar Dryer with Automated Temperature Controller Technology’ chu Prof. Lalnilawma, Minister hnen ah an hlan. GITAM University aiawh a lo kal te chuan he thiamna hi kuthnathawktute tih hmasawnna tur a hmalakna a nih thu leh Mizoramin hmasawnna kawng chak lehzuala a zawh theih nan a thlawnin an pe tih an sawi.

Horticulture Minister Prof. Lalnilawma chuan Mizorama kuthnathawktute thlai thar chhuah sawngbawl nana pho ro leh rep ro nan hun, sum leh tha tam tak sen ral a nih thin thu sawiin Hybrid Solar Dyer Technology hmang hian heng harsatnate hi sutkian theih a nih a rin thu a sawi a. Horticulture department hnuai a Mission for Integrated Development of Horticulture (MIDH) chak lehzual a kalpuina tur hmanraw tangkai a nih ngei a beisei thu a sawi. Kuthnathawktute tihhmasawn duhna avang a GITAM University leh Technology Enabling Centre (TEC), Mizoram University-te inpekna chu lawmawm a tih thu Minister chuan sawiin ramin hmasawnna kawng a zawh zel theihna turin thawhho chhunzawmpui ah a sawm nghal a ni.

GITAM Deemed to be University, Visakhapatnam aiawh hian Prof. Raja Phani Pappu, Dean, GITAM School of Business, Coordinator- DST GITAM Technology Enabling Centre (G-TEC) leh Prof. Lalnilawma, Minister chuan ‘Letter for Technology Transfer Understanding’ ah hming an ziah hnan a.  GITAM deemed to be University atang hian Dr. Ravi Kumar Gurazada- Distinguished Professor & Retired Outstanding Scientist BARC, Mr. Sombhatt Shastri, Chief Operating Officer-DST GITAM TEC, Dr. Karaka V.V.N.R Chandra Mouli, Manager- Technology Transfer Officer leh Dr. Krishna Kanth Pulicherla, Department of Science and Technology, Scientist-E te an rawn tel a. Mizoram University atang hian Prof. N. Senthil Kumar (Co-Coordinator), Department of Biotechnology, Dr. Rajesh Ramasamy (Co-Coordinator), Assistant Professor, Department of Tourism & Hospitality Management, Dr. Lalhmingliana Renthlei (Coordinator), Assistant Professor, Department of Management, Dr. Baby Zaithanpuii Hmar (Co-Coordinator), Assistant Professor, Department of Food Technology leh Pu C. Lalrinsanga, Project Associate, TEC-te an tel bawk a ni. 

DST GITAM – Technology Enabling Centre atang a lo kal mithiam te sawi danin ‘Hybrid Solar Dryer with Automated Temperature Controller Technology’ hi Technology Enabling Centre-a thiamna thar 22 an duan chhuah zing a pakhat a nih thu an tarlang a. Ni zung hmang a chak zawk a thlai thar chhuah pho rona tur niin 89 degree Celsius thleng a sa a dah theih a nih thu an sawi a. He technology hmang hian thlai pho rona, ‘Solar Dryer Unit’, feet 6 bial pathum chu cheng sing ruk bawr velin a khawr pum theih beisei a nih thu an tarlang bawk a ni.