Lawngtlai Horticulture Division leh Lawngtlai Florist Association tang kawp buatsaih Lawngtlai Horticulture Exhibition 2017 chu vawiin khan Lawngtlai Council Veng-a LADC Conference Hall-ah Horticulture Minister Pu PC Lalthanliana’n a hawng. 

Pu PC Lalthanliana chuan Lawngtlaia la awm ngai lo, a tum khat nana Horticulture Exhibition buatsaih a ni chu lawmawm a tih thu sawiin, hmasawnna tura bul tanna pawimawh tak a ni, a ti a. Horticulture chu hmasawnna kawnga ke pen tura hmanraw pawimawh ber a nih thu sawiin, tui ve satliah leh ti mai mai ni lo va, tih tak taka beite tan chuan hlawhtlinpui theih ngei tur a ni a; sawrkar paw’n tanpui ngai ni lo, tanpui tlak tak takte chauh puih a tum a ni, a ti. 

Khual Zahawm Horticulture Director Dr Elizabeth Saipari pawhin thu sawiin, Exhibition-a pangpar pho chhuahte chu a chi kimin, hmun dang nena khaikhin pawha sitawm bik lo a ni, a ti a. Pangpar khawi hi ei zawnna tlak a ni a, Lawngtlai District-ah pawh uar chhoh zel ni se a duh thu a sawi bawk. 

He Exhibition hawnna hi Lawngtlai Divisional Horticulture Officer Pu L.Lalhmingmawia Pachuau chuan a kaihruai a. Rev Dr LH Lalpekhlua’n hunserh hmangin, Lawngtlai Florist Association President Pi Zodinpuii Fanchun pawhin thu a sawi a. Zaithiamte an zai bakah, HDO Pu Hunlawmawma’n lawm thu sawiin, hun a khar a ni. 

Lawngtlai Horticulture Exhibition 2017 hi Lawngtlaia tum khat buatsaihna a ni a. Item chi hrang 29 pho chhuah niin, pangpar lam chi a tam ber a; thil entir zawng zawng hi a mal chhiarin 361 a ni. Item tinah hian lawmman pakhatna atanga pathumna thleng siam a nih bakah, consolation prize siam a ni bawk a. April ni 29, 2017 (inrinni) chawhnu dar 1 thleng hawn a ni ang.

Attachment

  • Loading attachment...