Vawiin khan Pu PC Lalthanliana Horticulture Minister chuan Horticulture Department Officers leh staff te Horticulture Conference Hall-ah meeting a neih pui.

He meeting hi session hnihin then a ni a , Session hmasa ah Director Pu R.Zotawna’n kaihruaiin Officers leh staff  te inhmelhriattir tawnna neih a ni a. Minister leh parliamentary Secretary Pu K.Lalrinthanga ten  thu an sawi bakah Secretary kal chhuak tur Pu Saithangpuia thlahna programme an hmanpui a ni.

Chawhnu lam session ah chuan Horticulture Minister Pu PC Lalthanliana’n kaihruaiin Secretariat leh Directorate Officers te leh District tin atanga Horticulture Officers  lo kal khawm te nen Mizorama Horticulture hmalak tawhna leh hmachhawp te, NLUP hnuaia hmalakna te sawihona neiin inpawh takin inkawmna an nei a ni.

Minister chuan thu sawiin Officer leh Staff te nen inpawh taka hnathawh thin hi a duhzawng a nih thu leh a tul chuan File kher lova phone pawh a in rawn tlan bawrh bawrh thin hi hna chak zawk na a nih dawn phawt chuan a duh zawng a nih thu a sawiin, Department hnathawktu ah hian a lian ber leh a te ber te pawh hi an pawimawh dan a in ang vek a, kawng then khat ah chuan a hniam zawk a thawk field staff te hi a taka luhchilhtu an nih na ah, hnathawk tha sawrkarin a tanpui phu taktak te leh hnathawk thalo tanpui tlak loh te hrechianga sawrkar hmalakna a taka khalh tu an nih zawk nate a awm avangin he department ah pawh hian Field staff te chungah mawhphurhna nasa zawk nghah a nih tur thu a sawi bawk. Minister chuan Horticulture Department chu Mizoram ei leh bara kan intodelhna tur  khawihtu ‘LAND BASE’ a eizawnna in nghahna ber department a nih avangin Horticulture Department hlawhchhamna chu Zoram kuthnathawktute hlawhchhamna a ni a, an hlawhtlinna pawh Zoram Kuthnathawktute hlawhtlinna a nih avangin Office dawhkan atang maia thawk thei kan ni lova, kan ram kuthnathawktute hlawhtlinna taktak hlenchhuah pui tur chuan ataka “LUHCHILH NUN” kan neih a ngai bik a ni a ti bawk.

Minister chuan Horticulture Department -ah Sawrkar thar a hmalakna leh kal phung thar tur a a duh  sawi chhuakin thlai chi hrang hrang a sem in phai lam atang te in chawk luh a ni thin a, hetah hian sawrkar sum tamtak hman a ni thin chu uluk zawk a ngaihtuahna hmanga tihtlem a nih tur thu sawiin, ramchhunga  thlai chingtu ten kan hmuh ve theih mai chi te pawh sawrkar atanga a thlawn a dawn leh hmuh kan tum tlat na rilru te pawh hi tihbova kan kuthnathawktu te kan zirtir a ngai a ni tiin; kan rama kan hmuh mai theih loh kan ram leilung leh sik leh sa in a ngeih si kan tangkai pui tur diktak te chu sawrkarin a ngaihtuah anga chutiang nilo kan rama kan hmuh ve theih ang thlaichi leh tiak lakluh vak vak tihtlem a duh thu a sawi bawk a ni.

Corruption chungchang pawh Minister hian sawiin department hnathawkte hriatlohvin ka corrupt theilova chutiang bawkin ka hriatlohvin Officer te an corrupt taktak theilo bawk, chuvangin eiru duh te tan Horticulture department ah hian hmun a awm dawn lo a ni  a ti.

He meeting ah hian Parliamentary secretary Pu K.Lalrinthanga pawhin Officers leh staff te fuihna thu tak tak a sawi a ni.