Vawiin khan Horticulture Minister Pu P.C. Lalthanliana chuan Horticulture Conference Hall-ah Horticulture Department hnuaia Officer-te leh Field Staff-te meeting a hmanpui a. He hun hi Parliamentary Secretary Pu K. Lalrinthanga leh Horticulture Secretary Pu. B. Lalhmingthanga ten an hmanpui bawk.

He hun, Horticulture Director Pu R. Zotawna khaihruaiah hian Horticulture Minister chuan Horticulture Department hlawhtlinna chu Zoram kuthnathawktute hlawhtlinna a ni a, a hlawhchhamna pawh kuthnathawktute hlawhchhamna a ni tiin, department hnathawktute chu inthlahdah lova thawk turin sawm a. Field staff-te chu department in programme a neih leh a hnathawh zawng zawng a hmunah hriatpui a vil thei an nih avangin, inpekna thar nen a hna thawk turin a fuih bawk.

Minister chuan NLUP hmalakna chungchang sawiin, tun atanga reilo tea chhunzawm a nih leh hunah chuan a hlawhtlinna dawngtute kutah chauh dah mai lova, department hna thawktute chuan mawh an phur tel vek a ni tih hriain, ngun taka enkawlpui turin leh, a ti tha duhlo leh hlawhtlin tumlo an awm chuan NLUP atanga paih chhuak ngam tur a ni, a ti bawk.

Parliamentary Secretary Pu K. Lalrinthanga chuanin thu sawiin, Mizoten thlai leh theite hlut nachang kan hre thar zel a, hei hi thil lawmawm tak niin, Horticulture Department thawktute tan pawh tanna thar tur ani a ti a. Thlai chingtute hnenah thlai chungchanga an hriat tur pawimawhte chu awlsam leh chiang taka inhrilhriat a pawimawh thu a sawi bawk a ni.

He huna thusawitu dang Horticulture Secretary Pu B. Lalhmingthanga chuan Horticulture Department officer leh thawktute chu mipui dawr reng an nih angin dawr nuam taka awm a, an hna a inpumpek turin leh dik taka hun vawng tur te in a chah bawk.

Vawiin Horticulture thawktute inhmuhkhawmnaah hian Aizawl chhung leh District hrang hrang atang ten Officer leh field staff-te an kal thahnem hle a. Zawhna leh chhanna hun hlawkthlak tak hman a ni bawk.