893/2024-2025

Aizawl the 21st June, 2024 : Vawiin khan Mizo Academy of Sciences (formerly MIPGRASS) General Body Meeting vawi 25-na leh Seminar on Science & Technology for Sustainable Development an neih chu Minister of State, Horitculture, etc. Prof. Lalnilawma’n Seminar Hall, Pachhunga University College-ah a hawng.

MAS Meeting leh Seminar hawnna inkhawm ah hian Vice-President Prof. H. Lalruatsanga kaihhruaiah Khuallian Prof. Lalnilawma chuan thusawiin ‘sustainable development’ (hmasawnna ngelnghet) tih tawngkam hmanna a rei tawh ang huin a taka hmasawnna hmuh tur eng ang chiah nge awm tawh tih chu inenfiah a pawimawh a ni a ti a. Science hmasawnna chuan ram leh a mipuite tan hmasawnna a rawn keng tel tur a ni a, hmasawnna reng reng chu ‘sustainable development’ anga kalpui a nih loh chuan awmzia a nei thui thei lo tih a sawi bawk. Science thiamna chu a tha leh a chhe zawnga hman theih ve ve a nih laiin Mizoramah chuan thiltha tihna atana hman a ni ber chu lawmawm a ti a, science lama mithiamten an thiamna leh thuziahte chu Mizo ram leh hnam, khawtlang leh mipuite nunphung tih hmasawn (quality of life) nan hmang se tih a duh thu a sawi bawk. MAS member tunhnaia PhD, NET leh GATE degree hmu tharte a lawmpui thu sawiin Seminar hlawk taka an hman theih nandusakna a hlan a ni.

Keynote Address sawitu Dr. Aldrin Malsawmtluanga chuan India ramin zalenna a hmuh phat atang khan ram hruaitute chu nuclear leh space programme lamin a hneh hle a, science thiamna hi ram hmasawnna hnuk ani tih an man hle a ni a ti a. Kum 1976-a Fundamental Duties Constitution-a an belhah chuan Article 51A-ah ‘India khua leh tui zawng zawng tih tur chu nitin nuna science hman tangkai te, mihring hmasawnna ngaihtuah te, thil reng reng uluk leh chik taka ngaihtuah a siamthat hna thawh te hi a ni’. Sustainable Development Goals (SDG) hian a tum chu khuarel thilte tichhe si lova mihring hmasawnna hnathawh a ni a; environmental, social leh economic lama hmasawnna tluantling thlen hi a tum a ni tih a sawi. Mihringte hian dam khawchhuah nan mamawh pathum a neih - chaw, tui leh energy tih tarlangin tun dinhmunah NITI Aayog-in SDG India Index 2020-a Mizoram a tehdan chuan India ramah a titha pasarihna a ni a ti.

MAS General Secretary Report tarlan danin tunah hian member 502 an awm mek a. Vawiin MAS General Body Meeting thurel zingah Directorate of Science & Technology chu Department puitlinga hlankai te, Mizoram Science Research Database siam chungchang leh Single Use Plastic hman khapna dan khauh zawk kenkawh dan tur chungchang te a tel a ni.