Vawiin chawhnu khan Assembly Session-ah Pu K.L. Liantlinga’n zing Session-a a putluh Private Member’s Resolution “ Mizo Lalten (Chief Council of Mizoram) an ram leilung man (Compensation) an claim hi Central Sorkarin a pek ngei theih nan kan Sorkar hian chak takin hma lak pui rawh se’ tih chu sawi chhunzawm a ni.

Private Members’ Resolution chungchang hi Chief Minister Pu Lal Thanhawla, Education Minister Pu Lalsawta, Parliamentary Secretary Pu Lalrinawma Ralte, Pu Lalthansanga, Dr. R.Lalthangliana ten zau takin chawnhnu session ah khan an sawi a. Pu Lal Thanhawla chuan Mizote leh Mizo hnahtlak te chu British in Divide and Rule Policy hmanga India ram an awpna tuar nasa berte zing ami kan ni a ti a. State pali/panga ah thendarh niin ram pathum – British India Dominion, East Pakistan leh British Burma Dominion awpna hnuaiah dah an anih thu te; Jampui tlang dung leh Manipur ah te pawh a hnam leh a chi bing zawnga inlak hran a thatloh zia leh Mizo anga lungrual taka awm leh pawm tlan chu Mizo hnam ropuina leh Mizo hnam zahawmna ber a nih thu a lo sawi thin fo thu te a sawi a. Resolution hian nghawng tha zawk leh chak zawk a neih theih nan ngun taka thlir hova resolution hi huam zau zawka siam tha a tih thu a sawi bawk.

Pu Lalduhoma pawhin vawiin Session-a Private Member’s Resolution sawihona leh Chief Minister thusawi chu a quality a san thu leh he thil ah hian political party zawng zawng pawh an lungrual thu a tarlang bawk a ni.