Nimin tlai dar 7:00 khan Synod Conference Hall, Lunglei ah HPC Lunglei huaihawtin Infiammi India ram leh Mizoram State aiawha lawmman dawng pha chinte bakah Inter-District intihsiaknaa lawmman pakhatna dawng thei chin infiammi 37 te hnenah Sports Cash Incentive Award hlan an ni. He hun ah hian Pu Lal Thanzara, Parliamentary Secretary to Chief Minister chu Khuallian niin, Pu Joseph Lalhimpuia, Vice-Chairman HPC chu khual zahawm a ni thung. 1st Phase HPC Cash Incentive Award ah hian infiammi Isaac Vanlalsawma, AFC Under 16 Championship 2012 a champion team a tel te, C.Lalsangliani, Athlete, NE Games 2012, Aizawl a neih zawh tak a Pathumna nita te leh Lalngaihzuali XXX Mizoram Secondary School Games, 2012 a neih taka Pakhatna ni te chu infiammi 37 zinga langsar deuh te an ni.

Pu Lal Thanzara chuan infiamna huang a sawrkar hmalakna leh thiltum, thalai te khawvel thar chu a taka kan hmuh tan tawh thu a sawi a. Infiamna chu infiammi te tana eizawnna tlak anih piah lamah ram leh hnam changkanna tehfung langsar ber anih tawh a ni, a ti. Kan hnam hmelma ruihhlo do turin infiammi te chu ‘Role Model’ an nih thu leh taimakna leh tumruhna nena Mizoram bakah India tihmingtha turin Infiammi te tam zawk leh nasa zawkin ke an rawn pen chhuah a ngai a ni, a ti. Infiamna chu inelna thianghlim ruihhlo lak atanga fihlim a ni tur a ni a, hlawhtling tur phei chuan taimakna leh tumruhna bakah insumtheihna a pawimawh tel a ni, a ti.

Pu Joseph Lalhimpuia Vice Chairman pawhin thusawina hun neiin, he HPC Incentive Cash Award hi a bul tanna leh infiammite kaihharh nana ruahman a nih thu a sawi a, Lunglei District chhunga thalai te pawh infiamna khawvel a rual el na chang hria in a tam zawk a rawn pen chhuak turin a chah a ni. Chief Minister leh Sports Minister te hmalakna leh inpekna avangin thalai te tan khawvel thar; infiamna ah leh eizawnna kawng dangah a inhawng mek zel a. Infiamna khawvel ah bik chuan hmuh theih in hmasawnna nasa tak a awm mek a, thalai te tan he hun tha hi bawhpelh chi a ni lo, a ti.

HPC Sports Cash Incentive award vawikhatna programme hi Pu R.Lalrosanga, Member HPC leh Cash Incentive Award committee Chairman in a kaihruai a, Pu J.Vansangzuala, DS&YO Lunglei in report tawi pe in, Pu Johny Zoramthanga Dy. Director HPC in thusawina hun a nei bawk. Khuallian leh khual zahawm ten thu an sawi zawh hnu hian infiam mi 37 te hnenah hian chawimawina thuziak leh sum fai hlanna hun hman a ni.