Lunglei District High Power Committee Vice Chairman Pu Joseph Lalhimpuia chuan nimin April 11 khan a bialchhung Rotlang 'E' tlawhin hmasawnna hna thawh mekte a hmunah a enpui.
HPC Vice Chairman hian a mah lo lawmtu khawtlang mipuite hmaah thu sawiin, mahni leh Party aiin khawtlang leh ram hmasawnna kan ngaihpawimawh hmasak a ngai a ni a ti a, Mizoram sawrkar Policy pawimawh tak NLUP chu party bik thliar lovin, rualtlang taka sem zel a ni dawna, tuna dawng tawh te pawhin a vawihnih na an dawngleh thuai dawn a ni a ti bawk. Pu Joseph-a chuan, sawrkar chuan Power a kan intodelh theihna turin nasa takin hma a la a ni a ti. Education Minister duhsakna avangin Mizoram sawrkar chuan Rotlang 'E' ah High School a dah dawn thu leh a hmun tur khawtlang hruaitu ten an ngaihtuah fel veleh kutthlak nghal tur a ni thu a sawi bawk. Hei bakah hian kum 2011-2012 Mizoram sawrkar Budget ruahman chhinah HPC tan cheng nuai 800 dah a nih thu HPC Vice Chairman hian a sawi lang bawk a ni. Rotlang 'E' khawtlang hruaitute chuan kum hnih lek chhunga an khaw panna Motor kawngpui siamthat hna bakah, Health Sub Center an neih theih avang leh Tui lakna tur te a ruahman sak avangin an bialtu MLA chungah hian lawmthu an sawi bawk a ni.
