Ministry of Textiles, GOI bultum saka Mizoram Apex Handloom & Handicrafts Cooperative Society Ltd. (MAHCO) buatsaih ni 3 chhung awh tur ‘Lunglei District Handloom Fair’ chu vawiin khan Saikuti Hall-ah Lunglei HPC Vice-Chairman Pu S.Laldingliana’n a hawng.

Handloom Fair hawnna inkhawm MAHCO Manager Pu K.Rothawmliana kaihhruaiah Khuallian Pu S.Laldingliana chuan Mizoten mahni hnam ziarang pholang thei thilte ngaihsanna chang kan hria hi a lawmawm hle a ni, a ti a. Mizo hnam incheinate chu hnamdangin min ngaihsan sakin min chawimawi sak dawn lova, Mizote ngeiin kan hnam incheina leh hnam ziarang pholang thei thilte ngaisangin kan tihlar deuh deuh a ngai a ni, a ti. Commonwealth Games 2010-ah Indian Contigent hmahruaituin Mizo hmeichhe incheina dik taka a inthuam khan Mizo zawng zawngte thinglung a tilawm a, Mizo nih nuam kan ti a ni; chutiang bawkin vawiina kan Mizo hmeichhiaten hnam incheina mawi tak puan pawh bih uar deuh deuh se a duh thu a sawi a. MAHCO Fair hian chhimlam mite beng harh se, handloom lamah tanlak nachang hre deuh deuh ila tiin Pu S.Laldingliana chuan kalkhawmte a fuih bawk a ni.

Lunglei District Handloom Fair hawnna inkhawm-ah hian ARCS, Lunglei District Pi Lilypari Sailo leh MJA Lunglei President Pu K.Lalrinpuia te pawhin thusawiin handloom leh handicrafts themthiamna lamah Lunglei District huamchhungah tanlak a tul thu an sawi a. MAHCO Manager Pu K.Rothawmliana chuan Report tawi pein MAHCO chu kum 1977-a din a nih thu leh Mizorama Co-operative zingah chuan a upa deuh ber pawl a nih thu a tarlang a. Puantah thiamte zawngkhawmin, khawl leh la te MAHCO chuan a tum sak vek a, chutiang bultan chhovin Mizorama Industry zingah chuan a hmasawn chak ber ni tawhin tunah hian MAHCO hnuaiah mi 160 an in-register tawh a ni, a ti.

October ni 8-10, 2014 inkara neih tur Lunglei District Handloom Fair-ah hian Mizoram hmun hrang hrang atangin handloom & handicrafts lama sumdawng mi 36 lai an tel a ni.