Mizo Zirlai Pawl, Headquarters Lunglei chuan vawiin khan Saikuti Hall-ah Lunglei atanga HSLC & HSSLC 2015-a Top 10-a lang phate leh Lunglei sikul hrang hrang atanga Distinction-a pass zirlai tithate chawimawi hun an buatsaih a, he hunah hi Lunglei HPC Vice-Chairman Pu S.Laldingliana chu Khuallian niin zirlai tithate hnenah lawmpuina thilpek a hlan a ni.

Zirlai tithate chawimawina inkhawmah hian Khuallian Pu S.Laldingliana chuan Lunglei leh Chhim bial atana zirlai chhuanawm, HSLC & HSSLC 2015 Top Ten zinga lang pha an awm tan ta chu MZP Lunglei ten kum engemawzat chhung zirlaite zinga beihpui an thlak thin rah duhawm a ni tiin MZP-te hmalakna a fak a. Mizoten chin dan tha kan chin chho zel chu mi chawimawi tlak te chawimawi a ni a, hei hian Mizo khawtlang leh mimal ngaihdan leh sukthlek pawh thui takin a siamthat ngei a beisei thu a sawi. Hmanah chuan “Hmar lamah sum a awm a, Khawchhak lamah tha leh chhim lamah chuan thluak a awm” tia sawi thin a ni a, Mizote zinga kawng hrang hranga hmahruaitu leh mi langsar tak takte pawh chhimlam chhuak an ni thin a; engemawchen chu chhim lam atangin zirna leh hnathawh lamah chhuan vak tur a awm loh hnuah tunah chuan Mizoram pumpuia pakhatna dinhmun hial hauh an awm leh thei ta chu a ropuiin a lawmawm takzet a ni, a ti. Zirlai leh zirtirtute thahnemngaihna chuan hun lo kal zelah pawh rah duhawm chhuah zel se a duh thu a sawi a. Zirlaite chu kohhran leh khawtlangah a tawk chauha inhmang tur leh thil dang zawng zawng aiin an zirna chiah dah pawimawh thiam turin a fuih bawk a ni. Khuallian hian HSLC 2015 Topper Jennifer Vanrammawii hnenah citation, cash award bakah Lunglei ‘E’ bialtu leh Minister ni bawk Pu PC Lalthanliana’n lawmpui nana Laptop a pek chu vawiina inkhawmah a hlan nghal a; HSLC 2015-a pathumna C.Lalnunfeli hnenah citation leh cash award a hlan nghal bawk a ni.

Vawiina MZP Hqrs. Lunglei ten Topper leh zirlai tithate chawimawina hun hi an Vice-President Tv.Lalrammuana’n a kaihruai a. MZP Hqrs. Lunglei President ni thin Pu Eric R.Zomuanpuia-in hunserh hmangin, MZP Lunglei Jt Secretary Tv.Lalramthanga Chinzah-in kum kalta chhunga an hmalakna hrang hrang report tarlanna hun a hmang a. MZP Gen. Hqrs, Aizawl atanga he hun hmang tura lo kal General Secretary L.Ramdinliana chuan zirlai Distinction-a pass te leh 100% pass percentage nei sikul hrang hrangte lawmpuina Certificate a hlan a ni.

Attachment

  • Loading attachment...