Hrangturzo Assembly Bial a By-Election ah Pi Vanlalawmpuii Chawngthu chu thlan tlin a ni a. Vawiin khan MP Inthlan a vote tla te chhiar rualin Hrangturzo Assembly bial a MLA by election a vote tla te pawh chhiar a ni a. Pi Vanlalawmpuii Chawngthu INC candidate hian vote 6721 a hmuin he bial MLA thar atan thlan tlin a ni a. Amah hnaih bertu Independent candidate Pu H Lalduhawma’n vote 4218 a hmu a, NOTA-ah vote 135 a tla a ni.

Pi Vanlalawmpuii Chawngthu hi Mizoram Legislative Assembly 7-na a Hmeichhe MLA awmchhun tur a ni dawn a. Pi Vanlalawmpuii Chawngthu hi Pu C. Chawngkunga leh Pi Lalliankimi Sailo fanu niin kum 34 mi a ni a. Zirna lamah MA (Political Science) niin Mizoram Pradesh Youth Congress Committee (MPYCC) a nihna hrang hrang te lo chelh tawh in tunah hian MPYCC President ni lai mek a ni a, Dawrpui Vengthar ah an khawsa a ni.