India Republic Day, 2017 lawmna Aizawl-a neih tur chung changah Aizawl D.C chuan a hnuaia mi ang hian hriattirna a chhuah a, ngai pawimawh turin sawrkar hnathawkte a ngen nghal bawk a ni.

1. Mizoram sawrkar-a Ministers leh MLA rualte’n District dang leh Sub-Division dangah Official-a an hman dawn loh avangin Aizawl-ah hmang vek tura ngaih an ni a. Sawrkar hnathawk kal tura sawm zawng zawng te chu, he ni pawimawh lawmnaah hian tha taka tel tura beisei an ni. Chuvangin Enclosure-X (VIP Gallery )-a kan dah thin Officials tam tak kan indah vek thei dawn lo a, Mizoram sawrkar-a Secretary leh a tlukpui chin chunglam te chu Enclosure-X ah hian thutna pek vek an ni ang.

2. Addl.Secretary/Jt.Secretary leh an tlukpui te pawh Invitation Card ah chuan Enclosure-X (VIP Gallery)) pek tur anga ziah vek phawt a ni a, a kal hmasa apiang EnclosureX ah thuttir zel an ni ang. Enclosure-X a leng bak zawng chu Enclosure-A (VIP Gallery hmarlam chiah) ah thuttir an ni ang.

3. VIP Gallery-a awm tur, lo kal ngei tura hriat lawk leh beisei te tan seat lo dah awl a ni thin a, felfai zawka thutna ruahman anih theih nan a bik takin heng mite phei hi chu VIP lo thlen hma zing dar 8:30 ah thlen theih hram nise tiin kan in ngen a ni.

4. AR Lammual ah motor dah vek theih anih dawn loh avangin Lammuala tlan lut thei tur chin chu Invitation Card pek rualin’Car Pass’ pek vek an ni ang a, Car Pass pek loh te chu motor kawngpui atangin ke in Lammual ah luh mai a ngai dawn a ni. Ministers leh MLA te erawh chu Car Pass pek kher tul lovah ngaih an ni. Car Pass hi motor windshield ah Traffic Duty te hmuh mai theih turin tar ni se. Car Pass ken loh avanga harsat tawk an awm anih chuan anmahni mawh a ni ang.

Hmunhmain min zawh loh deuh avanga duhthusam anga ruahhmanna siam theih anih loh avangin official te hriatthiamna an dil e.