No.351/2021-2022 

  Aizawl, 1^st May 2021: Rural Development Minister Pu Lalruatkima chuan COVID-19 hripui lengin Mizoram min tihbuai mek karah mipuite, a bik takin thingtlang lam ami ten harsatna an tawhte chhawk zangkhai a nih theih nan Rural Development department-in theihtawpin hma an la tih sawiin, sawrkar laipui theihtawpin an dawr a, kum 2021-22 chhung a MGNREGS hnuaia inhlawhna turin Ministry of Rural Development chuan April, 2021 khan Rs. 7788.34 lakh lai a rawn sanction tih a sawi. 

 Minister chuan kumin atang hian Job Card Holder pakhatin nikhatah Rs 233/-  zel an hlawh tawh dawn a, kum kalta 2020-21 chhunga inhlawhna Rs 225/- aiin Rs 8 in a tam zawk nghe nghe a ni, a ti. Tun dinhmunah Mizoram pumpui ah Active Job Card Holder mi 205481 an awm mek thu sawiin, Mizoram chhunga District hrang hrangte kumin April, May leh June thla chhunga an inhlawh dan tura ruahmanna siam dan tlangpui (projected person days) a sawi chu a hnuaia table ah hian tarlan a ni. 

  Minister chuan Mizoram pumah chawhruala lakin April thlaah ni 11,  May thlaah ni 12 leh June thlaah ni10 inhlawh turin ruahmanna siam a ni, a ti. 

 Pu Ruatkima chuan MGNREGS hnuaiah hian tuihna tipung tam thei tura kum 2019 atanga “Jal Shakti Abhiyan - Catch the Rain Campaign” kalpui a nih atang khan khaw thenkhatah tuikhur hnara contour trench kan siam chuan tuihna a ti tam zualin, kum dang zawng aiin thalah pawh kang lovin tui a luang reng tawh a, a bik takin Tuipang RD Block hnuaiah kan hlawhtling hle a ni, a ti a. Jal Shakti Abhiyan hi Mizoram khaw tinah kalpui tum a ni a. Hemi Campaign hnuaiah hian tuihna tipung thei tur leh Ruahtui tla luang ral mai lo a lo dawng khawl thei tur Tuizem, Farm Pond leh Dug-Out Pond te siam tum a ni, a ti a. Bawlhhlawh sawngbawlna turin Compost Pit leh Soak Pit te chu Job Card Holder chhungkua te siam tir tum a ni tih a sawi. 

  Minister chuan hemi piah lamah hian ei leh bar a hma kan sawn nan leh kan thlai thar te a lo punna turin hmun hrang hrang ah a theih ang ang in hmalak mek a nih thu a sawi bawk a ni.