Vawiin khan Minister Pu Lal Thanzara leh Deputy Speaker Pu R.Lalrinawma te chuan Sihphir Venghlun High School, HSLC pass tharte lawmpuina programme an hmanpui.

Pu Lal Thanzara chuan lehkhathiam hi ram hmasawnna leh changkanna hmanraw tha ber, dinhmun tha a min hlangkai theitu a ni, a ti. Kristian missionary ten bul tanin lehkhathiam hlutzia Mizo-te rilru ah an tuh nghet hle a, hmarchhak kilkhawra awm ni mah ila ram changkang zawkte uar leh buaipui chu kan hriain kan ti ve thei vek a, ramchhung hmun danga tribal te aiin khawsakphungah leh inchei danah pawh kan changkang zawk hle a, heng hi lehkha kan thiam vang a ni, a ti a. Mizote hi ziak leh chhiar thiamin changkanna a thlen nasatzia tilang chiangtu kan ni, a ti. Chutihrual erawh chuan hlawhtling zik tluak tura tihmakmawh, teirei peihna leh tum mumal (goal) neih kawngah hnamdang kan tluklo a ni a ti a. Degree nei ve si, hna hmutheilo ni ngawt lova, chhawrtlak thiamna pawchhuak ngei turin zirlaite a sawm a, tute emaw sawipui ngai lova mahni thiamna avanga dingchhuak tura tan la theuh turin a chah a ni.

Pu Lal Thanzara chuan zirlai pass tharte lawmpuina hlanin, hlawhtling ve rihlo te pawh hnual mai lo tur leh khawiah pawh kal se, engpawh ti sela thawhrimna aiawh tur a awm lova, vannei tur pawhin taihmak a ngai tih hrereng turin a fuih a ni.

Mizoram Legislative Assembly Deputy Speaker Pu R.Lalrinawma, bialtu MLA ni bawk pawhin thu sawiin Sihphir Venghlun High School-in result tha tak an nei thei chu nu leh pa, zirtirtu, zirlaite leh School Managing Board te tan rualna vang a ni, a ti a. Zirlai tha thlankhawm luhna nilo, a kal duh apiangte admit-na sikulin HSLC result hnuhnung bera top 10 a tling phak an nei hial chu fakawm a ti a. Zirlai hlawhtling tharte chu tun hi a bul tanna chauh a ni tih hria a thawhrimna nen hrehawm tuar huama kal zel tur leh hlawhtling tur chuan midangte peih chin baka thui kal a ngai tih hre reng turin a chah a ni.

Sihphir Venghlun High School hian an sikul atanga regurlar -a exam mi 25 ah 22 an pass a, private a exam 8 an pass bawk. An sikul atang hian Lalnunchama chuan Distinction-ah pass in 9-na dinhmun a hauh a, zirlai 3 dang First Division ah pass in, zirlai 10 Second Division-ah, zirlai 16 chu Third Division-ah an pass a ni.

An sikul hi 1994 ah khawtlang mi thahnemngaiten an din a, April 1, 2008 khan Adhoc Aided School-ah dah a ni. Tun dinhmunah Staff 10 leh zirlai 120 an nei mek.