238/2023-2024

Champhai, the 27th April, 2023: Higher & Technical Education Minister Dr. R.Lalthangliana chuan vawiin chawhma dar 11:30 khan Rastriya Uchhatar Shiksha Abhiyan (RUSA) 2.0 sum cheng nuai 100 senga sak, Govt. Champhai College Commerce Building thar chu khuallian niin a hawng. He hunah hian Law & Judicial Minister Pu T.J. Lalnuntluanga, Champhai South bialtu MLA leh H&FW Board Vice Chairman Dr. ZR. Thiamsanga, Champhai North bialtu MLA te chu khualzahawm an ni.

Khuallian Dr. R. Lalthangliana chuan Champhaia zirna hmasawnna kawnga pawimawh pakhat Govt. Champhai College-a Commerce Building tha tak hawn a ni chu lawmawm a tih thu a sawi a. Tunlai zirna kal chho mek zelah Multi Displinary Institution-te an pawimawh nasat zual hle tih sawiin, Commerce zirna hawn chuan hemi puitlinna tur hian kawngro thui tak a su a ni, a ti a. Govt. Champhai College-in Campus nuam leh tha tak an nei chu a lawmpui thu a sawi a. National Assessment and Accreditation Council (NAAC) endikna chungchanga hriattur pawimawhte tarlangin, tun aia hmasawn thei tura tanlak ngaihnate inenfiaha, chona thar hmachhawn thei tura tha taka inpuahchah turin a chah a. Kalkhawmte chu hlawhchham changa beidawng mai lo tur leh tanlak nana hmang zawk tura fuihin, hlawhtling tur chuan teirei peih a ngai a, inthununna tha, daihreina leh taimakna neia theihtawp chhuah turin a fuih bawk.

Higher & Technical Education Minister chuan College Zirlaite chu khawvel changkang zelah zirna atana mamawh an neih hrang hrangte awlsam taka chhawpchhuah sak an nih thu leh, an banphak maia hmanraw mamawhte a awm tawh avanga an vanneih zia inhre thar a, hun leh hmunhma tha an neihte khawhral mai lova, thiamna tak tak zir nante, mi danglam leh tha bik ni thei tura tanlak nantea hmang zawk turtein a fuih a. An dinhmun leh khawsaknate chhuanlama hmang lo tur leh chona atana hmang zawka, midangte tih theih chu ti ve zel thei tura tumruhna leh huaisenna neih tum turtein a chah bawk a. Zirna leh thiamna sang zawk nei mizo thalai tam zawk, mizo mipuite mamawh phuhru thei tur kan neih belh zel a pawimawh thu sawiin, hnam dangte tih theih ang chu kan ti ve thei a ni tih hriaa theihtawp chhuah turin zirlaite a fuih bawk.

Khualzahawm Law & Judicial Minister Pu T.J. Lalnuntluanga chuan a lo zir chhuah tawhna Govt. Champhai College-a Commerce Building thar tha tak hawn a ni chu lawmawm a tih thu a sawi a. College tih changtlung nan tunhma atanga hmalak a nih dante tarlangin, Champhaiin rahbi pawimawh tak a kaina zirna in sang Govt. Champhai College chu hmun dangte lakah pawh a zahpuiawm bik lo a ni, a ti a. Kalkhawmte chu mahni nihphung leh dinhmunte zahpui mai lova, nihna anga langchhuak ngam tur leh awhna sual laka inthiar fihlim tum turin a fuih a. Kum sangbi tel lo changkang tawh hnam dang leh ram dangte nena intehkhin mai lova, an dinhmun ang leh a aia sang zawk thleng thei tura taima leh rinawm taka thawk tura ngaihtuahna seng zawk turin kalkhawmte a sawm a. Hmabak eng tak nei thalaite chu dawhtheihna nei tur leh beih hram hramna thinlung pu chunga hlawhtlinna leh hmasawnnate dawnsawn tum turtein a fuih bawk a, ngaihtuahna dik leh hrisel pu tlat turin a chah nghal bawk.

Khualzahawm Health & Family Welfare Board Vice Chairman Dr. ZR. Thiamsanga chuan Champhai chu International leh State ramri depa awm khawpui pawimawh tak a nih thu sawiin, zirna sang zawk Mizoram University Campus thlenga dah theihna tur hmun pawimawh tak a ni, a ti a. Govt. Champhai College-in endikna hrang hrangte tha taka a paltlang thin leh mi chhuanawm tak takte a chherchhuak nual tawh chu fakawm a tih thu a sawi a. Zirlaite chu nakin lawka ram leh hnam innghahna tur an nih thu sawiin, an hmakhua ngaiin Champhaiah Sawrkarin MYC Coaching Centre a din thu a sawi a. Zirna lamah hma kan sawn loh chuan hmasawnna tluantling kan nei thei dawn lova, zirna kawnga hma kan sawn theih nan kan zavaia tanrual a ngai a ni, a ti bawk.

Hemi pual inkhawm College Multipurpose Hall-ah hman hi Dr. Zarzoliana, Addl. State Project Director (RUSA), H&TE Department chuan kaihruaiin Rev. C. Lalchhuanawma'n hunserh a hmang a. Er. Joshua Lalthakima, AE, RUSA-in technical report a pe a. Pu P. Lalhmingliana, Principal, Govt Champhai College-in lawmthu sawiin hun hman a khar a ni.

Govt. Champhai College Commerce Building thar hi RUSA 2.0 hnuai Infrastructure Grants to Colleges Component kaltlanga sum dawn cheng nuai 100 senga sak a ni. Building design hi L.B Associates, Aizawl siam niin, Contractor hi SkyRidge Construction & Consultancy Services, Aizawl a ni a. October ni 24, 2019 ah hna tanin February ni 28, 2023 ah zawhfel a ni. A chung zawng leh a sir zawnga zauh theih tur leh seismic zone 5 dinhmun mila sak a ni a. Zopa chhiara chhawng thum niin Room 5; Faculty room 1, Computer Lab 1 leh Classroom 3 te a awm a. Inthiarna tha tak a awm bawk a ni.

Govt. Champhai College hi August ni 6, 1971 a din niin NAAC accredited B++ a ni mek a; Science, Commerce, Arts leh BCA zirna an kalpui mek a ni.