Vawiin khan ram hmun dangte rualin Mizoramah pawh ‘National Science Day’ hman a ni a, he Ni puala inkhawm pui ber Assembly Annexe Conference Hall, Aizawl-a neihah H&TE Minister Dr.R.Lalthangliana chu Khuallian a ni.

‘National Science Day’ hmanna inkhawm Dr.C.Vanlalramsanga, Secretary, Planning (Science & Technology) kaihhruaiah Khuallian Dr.R.Lalthangliana chuan Mizoram hmun hrang hranga a ruala he Ni hmangtu zawng zawngte leh Science lama tui leh ngaisangtu zawng zawngte National Science day chibai a buk a. Tunlai khawvel technology sang zel hi Mizote um phak lovah ngaih tlat chuan hmasawn a har ang a, chhuk emaw phei emaw zawnga en thiam erawh chuan a zuamawmin khum theih hial turah indah a awl zawk tiin Dr.R.Lalthangliana chuan Mizote chu hnamdangte tluk lo tura Pathian siam an bik ni lo a ni, a ti. Science leh technology avangin engkim a awlsam tawh a, hei hi hmasawn nan hman vek loh chuan a chhe zawngin  mihring nunphungah nghawng  a nei thei a ni, a ti bawk. Mizoram chu ram hausakna tam tak a nei sa a, heng leilung hausakna Pathian pek hi engtinnge hman tangkai lehzual theih ang tih ngaihtuah leh hlawhtlinpui hi a rama chengte mawhphurhna a ni thung, a ti. Mizoram leilung hausaknate, a boruak, sik leh sa duhthusama tha leh nuam hi agriculture lamah zaa 60% chu hman mek a ni a, hemi piah lama hman tangkai zel theihna tur chu sorkar programme pawimawh tak SEDP-ah a tel ve a ni tih a tarlang bawk. Mihring chherchhuah ‘manpower development’ hi sorkarin a ngai pawimawh hle a, thiamna ‘talent’ nei bikte phei chu sorkarin nasa lehzualin an thiamna leh theihna tipung turin chher zel a tum thu te, Mizoten fashion lam an tui vangin Mizoram Institute of Fashion Designing te, Skill Development & Entrepreneurship lam chak zawka kalpui te, Tourism lamah khualzinte hipna tur kawng thar, Mizo ei leh in siam dante thlengin sorkar chuan a ngaihtuah tel zel dawn a ni, a ti. Mizoram chu ziak leh chhiarah sang mahila belhchhiandawl nih a ngai a, Mizote theihna ‘potential’ hrang hrangte hi khawvel zau zawk hriatah chhawpchhuah hi mitin mawhphurna a ni tiin Science & Technology hmanga ram tihhmasawn dan tur kawng hrang hrang ngaihtuah a, sawihona hun tha Seminar emaw Symposium emaw huaihawt turin a rawt nghal a ni.

Planning Secretary Dr.C.Vanlalramsanga pawhin thusawiin hmanah chuan science thiamna chu indoan ralthuamte siam nan chauh hman chi emaw tih a ni thin a, hun kal zelah mirhingte tana tangkaina a lo ngahzia hriatchhuah a ni deuh deuh ta a ni, a ti a. Tunah phei chuan mihring bakah leilung, boruak, sikmleh sa tana him thei ang bera science thiamna hman hi mithiamte tum ber a ni tawh zawk a ni, a ti. Mizote zingah science lama tui leh thiamte pawh an pung zel a, vawiin National Science Day pualin Mizo kutchhuak ngei engemawzat phochhuahna ‘Scientific Innovations Exhibition’ neih a nih thu a sawi bawk.

Chief Scientific Officer Dr.R.K.Lallianthanga chuan kumin National Science Day 2019 Thupui ‘Science for the People and the People for Science’ chungchang sawizauna hun a hmang a. Science thiamna chuan mihringte tana thil tangkai tam tak, heng - Penicillin, Insulin, Highly Active Antiretroviral Therapy (HAART), Immunotherapy for cancer, Gene-editing biotechnology, Light Emitting Diode (LED), Magnetic Resonance Imaging (MRI) te bakah lirthei, inbiakphawna, electronics, adt lamah pawh nasa takin science chu mihring hmasawn zel nan hman a ni mek a; mihringte zawk hian engtinnge science tana an tangkai a, science hamsawnna tur atana an thawk thei ang tih hi a pawimawh hle a ni, a ti. Tun dinhmunah hian India rama state 29 zingah Mizoram leh Meghalaya chiahin Science & Technology Department a hranin an la nei lova, chu bakah Mizorama College 20 awmte zingah 5 chauhin Science zirna an nei a ni tih a sawi bawk.

Sr. Scientific Officer Pu Samuel Lalmalsawma chuan National Science Day Report a pe a. India scientist ropui Sir C.V.Raman-in February ni 28, 1928 khan a thil hmuhchhuah tangkai tak, ama hming chawia an phuah tak leh Nobel Prize pawh kum 1930-a a hmuhna chhan ‘RAMAN EFFECT’ a hmuhchhuah ni champha pualin India rampumah 28th February, 1987 atanga khan ‘National Science Day’ hi hman tan a ni a. He Ni-ah hian ramchhunga zirlai naupang, thalai leh puitlingte hnenah Science chungchang hrilhzaunate neiin, intihsiakna hrang hrang hmangin science lama tui leh thiamte thlanchhuah ni atan an hmang thin bawk a ni.

Mizoramah chuan ‘National Science Day’ hi kum 2006 atanga khan hmang tan niin Astronomy Camp, Mock Parliamentary Show, Science Awareness Campaign, Nature Study, Essay Competition, Science Exhibition, Exposure Tour te huaihawt a ni tawh thin a. Vawiinah pawh hian Aizawl bakah District dang zawng zawngah pawh ‘National Science Day’ pualin hun hman a ni.