1448/2023-2024

Aizawl, the 10th August, 2023: Higher & Technical Education Minister Dr. R.Lalthangliana hovin vawiin chawhnu dar 1:00 khan National Education Policy (NEP) 2020 kalpui chhoh mek chungchanga hmalak tawhnate thlirhona leh inrawnkhawmna hun Vanapa Hall-ah neih a ni.

Khuallian nia he hun hmanpuitu Higher & Technical Education Minister Dr. R.Lalthangliana chuan ataka NEP 2020 kalpui turin thil pawimawh leh hriatchian tulte a awm avangin kalphung tharte zirna in hrang hranga thawkte'n an hriat bel a tul thu a sawi a. Khawvel changkang zelin thiamna sang zawk kentel tam tak a neih thu sawiin, thalaiteah thiamna satliah mai nilo, thiamna tak tak leh ataka hman tangkai theih tur chi tuh a ngai tawh a, hemi kawnga tanlak a tulzia NEP 2020 hian a lantir a ni, a ti a. National Education Policy-in a phut chin mai nilo kan ramin a mamawh angte nei thei tura theihtawp chhuah turin Academician kalkhawmte chu a chah a ni.

H&TE Minister chuan National Assessment and Accreditation Council (NAAC) endiknaah tanlak a ngaih thu sawiin, tunhnaia Govt. J.Thankima College-in 'A+' Grade a hmu te, Govt. Serchhip College leh Govt. Zirtiri Residential Science College-te'n 'A' Grade an hmu tharte chu a lawmpui thu a sawi a. NEP 2020 tihhlawhtlin nana pawimawh tak State enkawl State University neih a tul thu sawiin, hemi tur hian Sawkarin ngun takin ngaihtuahna a senga, Cabinet meeting-a sawiho a nih hnuah din a nih theih nana a tul angte bawhzui tura thutlukna siam a nih thu a sawi a. State University dinna tur hian a bika ngaihtuahtu tur team din a nih thu leh a tul dan anga inrawnkhawmna zau zawk pawh neih tum a nih thu a sawi bawk.

Sawrkar laipui scheme pawimawh tak takte kalpui chhunzawm zel turin NEP 2020 in ti tura a bitukte tha taka hlen chhuah zel a pawimawh thu sawiin, a phut hrang hrangte tihlawhtling thei tura ngaihtuahna seng tur leh theihtawp chhuah turin kalkhawmte a fuih a. NEP 2020 hmanga thil thlak danglam turte huphurh mai lova, Sawrkar laipui policy, mithiamte rawn chunga duan chu chhawr tangkai thei tura insiamrem turin a chah a. H&TE Department hnuaia thawktute inpekna ropui a tih thu sawiin, College an hmangaihna leh zirna an ngaihpawimawhnaah lawmthu sawiin chhawmnung zel turin a fuih a. NEP 2020 chungchang sawihona leh inrawnkhawmna buatsaih chuan rah tha a chhuah ngei a beisei thu a sawi bawk.

Thusawitu dang Prof. Lalnundanga, Registrar, MZU chuan State University din chu NEP 2020 in tih makmawha a ruat ni lo mah se, NEP 2020 kalpui theihna tura hnukhnai ber leh pawimawh tak a ni, a ti a. NEP 2020 kalpui tura hmathlir thui tak neih a nih mek thu a sawi bawk.

He hun hi Pi Esther Lalruatkimi, IRS, Principal Secretary, Higher & Technical Education Department chuan a kaihruai a. Prof. Benjamin Lalrinsanga, State Nodal Officer, NEP 2020 & OSD to NEP 2020 Implementation Cell, Directorate of Higher & Technical Education Department hnen atangin hmalak tawh dante leh hmachhawpte ngaihthlak a ni a. Dr. Zarzoliana, Addl. State Project Director, RUSA in PM-USHA chungchanga hriattur pawimawhte a sawifiah a. Pu K.Lalhmangaihzuala, Deputy Secretary, Higher & Technical Education Department-in service matter chungchang a sawifiah bawk a. Zawhna leh chhanna hunte hman niin, Pi Sangchhin Chinzah, IAS, Director, Higher & Technical Education Department-in lawmthu sawiin hun hman hi a khar a ni.

NEP 2020 kalpui chhoh meka hmalak tawh zingah Institution Development Plan College tinte'n an thehlut tawh a. Mandatory Accreditation zawhfel vek tawh niin, refresher course leh training hrang hrang kalpui thin a ni a. Post Graduate Multi Displinary Course College 3 ah kalpui niin thawktu indaihlohna phuhruk nan hmalak a ni a. Skill Enhancement Course kalpui thuai tum niin, NEP 2020 awareness program vawi engemawzah neih a ni tawh bawk.

NEP 2020 Implementation Review Meeting-ah hian H&TE Department hotute, College hrang hrang Principal leh Lecturer-te, IQAC Coordinator-te bakah H&TE Board Member-te an tel tha hle a ni.