Dr. R. Lalthangliana, Hon'ble Minister, Higher &Technical Education ( H&TE) chuan vawiin khan Ratriya Uchchatar Abhyan (RUSA) hnuaia sak Library Cum Seminar Hall, Rs 160 lakhs leh Academic Building Rs 153 lakhs senga sak Govt Mamit College -ah a hawng.

Dr. Lalthangliana chuan Mizoramin hmasawnna hmel a hmuh theih nana ngaihtuahna seng Sawkar inneih avangin Mamit District chhungah hmasawnna hmel hmuh tur awm chho zelin Building tha leh changtlung tak hawn a ni ta chu lawmawm a tih thu a sawi a. Building hawn a nih theih nana ngaihtuahna, tha leh zung sengtu zawng zawngte chungah lawmthu a sawi a. Mizoram Sawrkar flagship programme SEDP hmanga, mimal, chhungkua inchawikanna tur chu Covid - 19 avangin duh anga kalpui theih nilo mahse hmasawnna hna hrang hrang erawh a kal mek zel a ni a ti. Mamit College chu khawpui danga College te ai pawhin Infrastructure nei tha in ni a, zirna tha din tur chuan Building tha neih kan mamawh hmasak angin Building tha leh changkang tak tak an neihte chu hmang tangkaia, thawktute leh zirlaite pawh ka ti thei ve a ni tih hria-a thahnemngai leh tih takzeta Mamit College hmel timawitu ni zel turin a chah.

Minister chuan Mamit District chu Aspirational District a nih angin, Medical, zirna leh kawng hrang hranga en bik leh chawikan ngai kan nih avangin Central atang pawhin tanpuina thahnem tak dawn thin a ni a, Aspirational District kan nih chhung hun/term chhung chu hmang tangkai a, Aspirational District kan ni a lawm, engmah kan nilo ang tih ngaihtuahna chu rap betin, Additional Fund dang hmuchhuak thei khawpa ngaihtuahna hmang turin kalkhawmte a chah bawk. 

Health Minister chuan Mizoram chu Covid - 19 hripuiin min nuai a, Sawrkar leh khawtlang, VLTF tangrualna avangin mithiamte'n an lo thlirlawk December thla chhunga kan vei tur an chhutlawk aia tlem kan la ni chu Pathian leh mipuite a vang a ni tiin kan hmalam hunah hun tha zawk kan neih ngei a beisei thu a sawi bawk. 

Er. H. Lalzirliana, 3- Mamit Bialtu MLA pawhin thusawiin Mamit District chuan hmelthar a hmu chho mek zela, chung zingah chuan Mamit College pawh tel ve-in kum 30 kalta-a College dintute hmathlir leh beiseina chu a takin kan hmu ta a ni a ti. Mamit District-in Science zirna kan la neih ngai reng reng loh Higher Secondary School-ah hawn a ni ta chu lawmawm a tih thusawiin a aia sang zawk zirna hawn a nih theih nana hmalakna pawh kalpui a nih dawn thu a sawi a. Khawpui leh hmundang pan nana cheng tam tak kan sen thin ngai tawhloin mahni inlum ngei maia tunlai thiamna changkang tak tak nena Mamit College- thuam an ni ta chu a changtu Minister leh Mizoram Sawrkar chungah Mamit District aiawhin lawmthu a sawi a ni. 

Vawiin-a hawn tak Library cum Seminar Hall hi a zau zawng 395.18 Sq.m niin Rs. 160 lakhs senga sak a ni a. mi 132 len theihna tur niin, a dung leh vang hi 72×27 Ft a ni. Classroom Building (482 Sq.m) sak nan hian Rs. 153 lakhs hman niin  Building hi a dung leh vang 103×24 Ft a ni a. Zirlai naupang 184 len theihna niin Classroom - 7 a  awm a. Faculty room - 1 a awm bawk a ni.  Building sak hna hi Mizoram Technocrats Company-te sak niin sak hna hi 9.3.2019 ah tan niin Ni 26.8.2020- ah zawh a ni. Building te hi lirnghing theina seismic zone V-a awm kan nih avangin Concrete Mix pawh grade 25 hman a ni a, steel reinforcement design leh bar bending te pawh IS 456 design specifications a ni. 

Mamit College hi kum 1983 ah hawn niin tunah hian zirlai 156 an awm mek a,  NAAC accreditation- ah Grade B a ni mek a ni. thawktu hi regular 15 leh temporary 14 an awm mek bawk a ni.

Vawiin-a Mamit College tana building hawnna hun hi Pu Biaktluanga, IAS Commissioner & Secy H&TE and State Project Director (RUSA) chuan kaihruaiin Dr. Lalrozama, IAS, District Bawrhsap chuan thu a sawi a. Pu Laltanpuia, ASPD- RUSA chuan Technical Report pein Pu MS Dawngliana Hnamte, Principal Gov't Mamit College chuan lawmthusawina a nei bawk.

He hunah hian sawmbik Officials, khawtlang hruaitute leh thutharthehdarhtute an tel a ni.