4789/2024-2025

Aizawl, the 24th March, 2025: Skill Development Cell leh Internal Quality Assurance Cell, Government Aizawl West College buatsaih karkhat chhung awh tur, Mizo tawng hman dan leh ziah dan inzirtirna workshop chu vawiin chawhnu dar 2 khan Higher & Technical Education Minister Dr. Vanlalthlana chuan Govt. Aizawl West College Auditorium-ah a hawng.

Higher & Technical Education Minister Dr. Vanlalthlana chuan workshop thupui thlan chu ram hnuk khawih thei thil a nih avanga a ngaipawimawh thu a sawi a. Nitina inbiakna tawngkam hman mai bakah social media lamah Mizo tawng kan mausam nasat tak zia leh veiawm a tih thu sawiin, ziak mi leh zir mite thu leh hla hi mi nawlpuiin kan zawm tur leh kan zir tur a ni, a ti a. Mizo tawng kaihhnawih pawl hrang hrang -Mizo Academy of Letters (MAL), Mizo Writers’ Association (MWA) leh Mizo Grammar Association (MGA) bakah sawrkar lamah kum 2022 atangin Mizo Language Development Board (MLDB) chu School Education Department hnuaiah din a nih thu sawiin, heng bakah hian kohhran leh mi mal thahnem ngaite’n nasa takin hma an la mek zel a, tunah hian thu inchuh tam tak leh inhnialna eng eng emaw kan la nei a, hemi ching fel tura lungrual taka kan thawh ho thiam pawh a tul takzet a ni, a ti bawk. 

School Education Minister ni bawk chuan school-a prescriptive grammar tha tak kan neih theih nan Mizo tawng hman dan leh ziah dan inang tlang (standardize) siam tura hmalak a tul tih sawiin, tunah chuan ziah zawm tur leh zawm loh turah kan la buai nasa a, hei hi inlungrual taka zir hova, inang tlanga kan hman theih tura chhawp chhuah kawnga chak taka hma kan lak a ngai a ni, a ti a. Awlsam zawka Mizo tawng thluk dan kan hriat theih nan tawng thluk chhinchhiahna (diacritic) mumal tak neih a tul thu pawh sawiin, tawng thluk chhinchhiahna inang tlang kan hman chuan thluk sual leh thluk dan inang lo kan pumpelh thei tawh dawn a ni, a ti a. Kan tawng ruhrel leh ziarang hi kan zir chiana, inang tlanglawna hman tur kan neih thuai a hun tawh thu a sawi bawk. 

Dr. Vanlalthlana chuan tunlai thiamna - Generative AI te'n Large Language Model (LLM) hmangin mihring tawng pangngai (natural language) chu innghah nanan an hman thu sawiin, AI khawvelah kan tawng hmanga kan dinchan ve dawn chuan kan tawng chu kan siam thata siam ngheh 'standardize’ vat a ngai a ni, a ti a. Mizo tawng hman kawngah duh tui hle a ngaih thu sawiin, thangtharte hnenah Mizo tawng hman dik leh ziah dik duhna hi kan intuh thar zel a tul a. Tawng hman dan leh ziah dan mumal lo leh chiri tak kan neih chuan zirnate, thil kan hriat thiamnate leh kan inlungrualna chenin a nghawng vek thei a ni, a ti a. Mizo culture humhimna leh identity ken kawhna pawimawh tak chu kan tawng hi a nih avangin a hman dan leh ziah dan uluk hi kan tih makmawh a ni, a ti bawk. 

He hawnna inkhawm hi Dr. Janet Vanlalhlimpuii, Chairperson, Skill Development Cell-in a kaihruai a, Dr. R. Lalsangpuii'n Mizo tawng humhalh a tul zia leh tihhmasawn a pawimawhzia bakah 8th schedule hiala telh a tul zia a sawi a. Pu Samuel VL Thlanga, Vice Principal, GAWC leh Prof. Benjamin Lalrinsanga te'n thu an sawi bawk. 

Workshop ah hian Pu Lalengzauva, Associate Professor, GAWC, Falung (Book of the Year lo) dawng tawh leh Pi Vanlalruati, Assistant Professor, Pachhunga University College-te chu resource person atan hman an ni.