1537/2025-2026

Dated Aizawl, the 7th August, 2025: Higher & Technical Education (H&TE) Minister Dr. Vanlalthlana chuan vawiin khan Govt. Zirtiri Residential College Building, Ramhlun South-ah Commerce & Industries (C&I) Department leh Ministry of Textiles hnuaia Weavers’ Service Centre (WSC), Aizawl-te buatsaih, National Handloom Day vawi 11-na lawmna hun chu khuallian niin a hmanpui a. Minister hian puantah mi 30 tana ni 45 chhung Samarth Training neih tur hawng nghalin, veteran weaver-te hnenah chawimawina a hlan bakah puantah mi 21 hnenah National Handloom Development Programme hnuaia puantahna hmun sakna tur sumfai a hlan nghal bawk a ni.

Minister Dr. Vanlalthlana chuan kalkhawmte chu National Handloom Day chibai bukin, Mizo puan hrang hrangte chawilar leh puantahtute hamthatna a ngaih pawimawh thu a sawi a. Mizo puan design chu a danglam bik riau avang leh hnam dangte mawi tihzawng a nih avangin, ram pawna thawnchhuah a nih theih chuan a hnam ang leh a tahtute tan hlawkna a ni dawn a ni, a ti a. Amaherawhchu, thawnchhuah dawn chuan international standard, export quality thaa tah a ngai dawn a, chu chuan puantahte nasa zawka tan la thar tura a chawh phur a beisei thu a sawi bawk a ni.

H&TE Minister chuan sawrkarin puantahte tanpui nana hma a lo lak tawhnate tarlangin, puantahte chu a zuartute nena thlunzawm an ngaih thu a sawi a. Hralhna tur rintlak (sustainable market) a awm chuan, eizawnna ngelnghet an nei thei dawn a ni, a ti a. Puantahte chu theihtawp chhuah a, an tanpuina dawnte pawh pelhe lova hmang turin a chah a ni.

He hunah hian C&I Department hotute leh WSC, Aizawl-a thawktute bakah puantahte an tel a. Pi Elizabeth Lalremthangi Hmar, C&I Jt. Director (HTH) chuan hun kaihruaiin, Pu Amarjeet Paswan, Jr. Weaver, WSC, Aizawl chuan lawmthu sawiin hun a khar a ni.

National Handloom Day hi kum tin August ni 4-ah India ram pumpuiah, Swadeshi Movement hriatreng nan, puantahtute ni atan hman thin niin, ram mipuite chu tualchher thil leh puante hmang uar tura inzirtirna atana hman a ni.

A lawmna hun pui ber chu Bharat Mandapam-ah India ram President chu khuallian niin an hmang a. Commerce & Industries Department chuan Mizoram aiawha he programme chhim tur hian Mizoram hmun hrang hranga mi puantah mi 5 a tir a. He hun lawmna pakhat, sawrkar laipuiin a buatsaih, 'Exclusive Handloom Expo,’ Handloom Haat, Janpath, New Delhi-a neihah Mizoram aiawhin, Lapar leh Fungki-te an inphochhuak bawk a ni.

Mizorama National Handloom Day vawi 11-na lawmna hun pui ber chu Millenium Centre Rooftop-ah hman a ni a. Pu Lalzirmawia Chhangte IAS, Commissioner & Secretary, Commerce & Industries Department chu khuallian a ni. Tin, Sailam cluster leh Tuirial cluster-ah hman bawk niin, Sailam cluster-ah hian Bialtu MLA Pi Baryl Vanneihsangi chu khuallian a ni a, Tuirial cluster-ah Pu Vanlalthlana, Higher & Technical Education Minister chu khuallian a ni bawk. Tuirial leh Sailam cluster-a he programme hmannaah hian NHDP hnuaiah puantahtute tanpuina sem nghal niin, central scheme hrang hrang inzirtirna hun leh puantah thiam upate chawimawina hun hman a ni bawk.