No.2755/2021-2022
Aizawl 28th October 2021: Vawiin khan Human Resources Development Board, Mizoram Science, Technology & Innovation Council (MISTIC) leh Mizorama Science Society hrang hrang - Mizo Academy of Science(MAS), Mizoram Science Society(MSS), Science Teacher Association of Mizoram(STAM) te tangkawpa buatsaih 'Workshop on identification of hard spot in Science subject for Middle School and High School in Mizoram' tih chu Education Conference Hall, Treasury Square ah buatsaih a ni a. He hun hi School Education Director Pu James Lalrinchhana leh Chief Scientific Officer Pu H. Lalsawmliana ten an hmanpui.

He Worksop hawnnaah Pu James Lalrinchhana, Director, School Education chuan thu sawiin Mizorama Science zirna kaihhnawih department, Science Society te leh official te platform pakhata Mizorama Science zirna hmasawn nana hna thawk thei tura an intelkhawm hi a ropui hle a ni a ti. Hei hi thawhhona tha 'convergence' neih kawnga hmalakna pawimawh leh hlu tak a ni a, zirlaite tana tangkai thei tur ang bera thahnemngai taka ngaihtuahna seng turin kalkhawmte a sawm bawk.

Pu H.Lalsawmliana, Chief Scientific Officer, MISTIC pawhin thusawiin Human Resources Development Board-in Science zirna kaihhnawih programme pawimawh taka Science & Technology tel vena remchang min siamsak hi lawmawm a tih thu leh hun kal leh zel turah line department leh science Society hrang hrangte nen thawhhona tha zawk neih zel theih a beisei thu a sawi a. MISTIC hian science zirna chawikan kawngah hma a la reng a, zirlaiten classroom zirna piah lama science tuina leh hriatthiamna an neih theih nan programme hrang hrang a buatsaih thin tih a sawi bawk. Science community tha neih theih nan ngaihtuahna senga thawkho zel turin Workshop chhimtu zawn zawngte a sawm bawk a ni.

He workshop-ah hian Mizorama Middle School leh High School science zirlaibua topic harsa zualte thlanchhuah a ni ang a, heng topic atan hian zirtirtu leh zirlaite puitu tur ICT Tools siamchhuak turin Human Resources Development Board in a tul angin hma a la chhunzawm leh dawn a ni.

He Workshop hawnna Pu C.Lalduhawma, President, Mizoram Science Society kaihhruaiah hian Department official, subject expert, textbook writer leh zirtirtu thlan bikte an tel a ni.

Attachment

  • Loading attachment...