No.691/2021-2022
Kawlkulh, 27th May, 2021 : Vawiin khan Pu L.Thangmawia, MLA Human Resources Development Board Vice-Chairman, Lengteng bialtu ni bawk chuan a bial chhung Kawlkulh khua-a Covid-19 Positive case 5 hmuh chhuah a nih tak avang leh in 154 lai home quarantine an nih mek avangin Kawlkulh leh a chhehvel khuate a tlawh.
Pu L. Thangmawia chuan Kawlkulh PHC-a hman turin Rapid Antigen Test (RAgT) kit 100, Pulse Oximeter 2, BP check-na 2, PPE kit 30, Glove (kutkawr) 400 nos, Hand sanitizer litre 10 leh a phuhna tur hmanruate a pe a, Kawlkulh Joint VLTF te tan Hand sanitizer, PPE, Mask, Glove leh mamawh hrang hrang te a pek bak ah, a tulna a pianga hman atan Kawlkulh Joint VLTF te Rs 50000 (Singnga) a hlan bawk a ni.
A chung ami bakah hian, Lengteng bial chhunga CHC leh PHC bakah a tul anga hman turin, RAgT kit 250, Pulse Oximeter 22, Digital Thermometer 40, BP check-na 8, face mask 1300, Surgical Glove box 14, Glove pangngai box 13, Disinfectant (Steri clean) 500ml 15, Germi Bust Disinfectant spray 13, Sprayer (16 litre) 2, Hand sanitizer (5ltr) 6 leh PPE –kit 12 chu Ngopa SDO(Civil) kutah Pu L.Thangmawia hian a hlan bawk a ni.
Pu L. Thangmawia hian Kawlkulh bakah, a bial khaw hrang hrang Dulte, Puilo, Tawitawkawn, Changzawl, Hliappui, Saichal leh Pawlrang te tlawhin Hand sanitizer, Mask leh Glove te a hlan a,an harsatna tawhte a hmunah a sawipuiin, rim taka hri dona atana an thawhnaah lawmthu a hrilh bawk.
Pu L.Thangmawia hian, a bial chhung bakah, Saitual District Level Task Force te tan cheng nuai khat leh Khawzawl District Hospital tan cheng singthum a lo hlan tawh bawk a ni.
Bialtu MLA Pu L.Thangmawia chuan,Covid-19 hripui leng chho leh mek ah a bial mipuite chu hripui leng laka fimkhur tura chahin, a bial mipuite an him a duhsak thu a sawi a, tumah chhuanchham an awm loh nan theihtawp chhuah a nih tur thu sawiin a tul apiangah inthlahrung lova be pawp thin turin VLTF hotute a ngen. Hrileng dona kawnga theihtawp chhuahtute zawng zawng chungah lawmthu a sawi a, Hripui dona kawnga sawrkar thuchhuah hrang hrangte zawm theuh tur leh harsatna eng pawh awm se a lakah bial mipuite inthlahrung lo turin a chah bawk a ni.
Ni 24.5.2021 ( Thawhtanni) khan Kawlkulh khuaah positive hmuh chhuah tan a ni a. Tun dinhmun ah COVID-19 Positive 5 hmuhchhuah tawh niin, chhungkaw 154 Home Quarantine lai mek an awm a, home quarantine te hi an vai hian Primary Contact vek an ni. Nitin sample lak mek zel a ni.
Tunah hian Kawlkulh khua atangin Albert Thanglenhnuna Saiawi s/o Zodinsanga Saiawi (Lab Tech), Lalbiakdika s/o Lalhmingliana (Supporting Staff) leh Jonathan Malsawmtluanga s/o PC. Lalchuangkima (Driver) te chu tlawmngaia in volunteer in an awm mek a. Hripui do tura Kawlkulh tlangval pathum te khawtlang tana an in volunteer chu ropui a tih thu leh chhuanawm a tih thu MLA hian a sawi bawk.
Vawiin vek khan Pu L.Thangmawia hian National highway No-6 (Seling - Champhai) kawng sial mek tu Dulte khua a inkulh mek ANUSHA Projects te tlawh nghalin, General Manager Pu Ram Kumar hnenah Corporate Social Responsibility (CSR) atanga Kawlkulh PHC tan X-Ray khawl leisak turin a ngen a. A ni chuan tha taka lo dawngsawngin Hyderabad lama an hotu lian zawk te nen video callin a inbiaktir nghal a, ANUSHA Projects hotute chuan MLA ngenna hi lo ngai pawimawhin a rang lama ziaka an hnena thlen turin MLA hi an hrilh a, Kawlkulh PHC a hman tur X-Ray khawl bakah ECG khawl pawh an leisak tur thu an lo hrilh. Lengteng Bialtu MLA Pu L.Thangmawia hian ziak a ngenna a thehluh thuai tur thu leh a ngenna te tihhlawhtlin sak an tum avanga lawmthu sawiin, ANUSHA Projects Manager leh a thawhpui te chu bial aiawhin lawmthu a hrilh a ni.
Attachment
- Loading attachment...
